අයිසෙ ජයමහ... මෙහෙ එනවා

කෝටිපති ව්‍යාපාරික තැන ඊයෙ දින තම සුපරි වෙළදසැල් ජාලයේ සේවයට බඳවාගත්ත ශ්‍රී ලාංකික සේවකයාට කතා කර සිටියා. ලාංකිකයා... රැකියාවේ සිය දෙවැනි දිනයේම ප්‍රධානියගෙන් කැඳවීමක් ලැබීම පිළිබඳ ඇතිවූ සතුටකිනුයි හිටියෙ. නමුත් කෝටිපති ව්‍යාපාරිකයගෙ මුහුණෙ එතරම් ප්‍රීතිමත් බවක් රැඳී තිබුණේ නැහැ.

කියනව බලන්න තමුන් ඊයෙ දවසෙ කී දෙනෙක්ට බඩු විකුණුවද? ප්‍රධානියා විමසා සිටිය.

සර්... එක්කෙනෙක්ට විතරයි ජයමහ පිළිතුරු බැන්ද.

ඔන්න ඕකනෙ අයිසෙ ලංකාවේ එවුන් ගන්නවට මගෙ කැමැත්තක් නැත්තෙ... තමුසෙලා වැඩක් කරන්න අකමැතිම ජාතියක්. බලනව මෙහෙ ඉන්න අනිත් හැමෝම... කස්ටර්මර්ස්ල 10,15 දෙනෙකුට බඩු විකුනනන්වා. තමුසෙ.. එක්කෙනයි දවසටම. මීට පස්සෙවත් හරියට වැඩ කරනව. නැත්තං තමුසෙව මං දොට්ට දානව. හිතුනොත් පුම්ක්ට පයින් දෙහෙකුත් දීල.

ඒත් මේ ලාංකික ජයමහ නොසැලුණු චිත්ත සක්තියකින් එතැන වැඩ හිටිය... ප්‍රධානියා තවත් මොනාහරි අහයි කියල. මෙහෙම හිටපු සේවකයාගෙන් ප්‍රධානියා ඊළඟට ඇහුව හොඳයි තමුසෙ ඒ කරපු එකම සෙල් එකේ ගාන කීයද... අඩු ගානේ මට ඒකවත් කියනව

සර්... ඩොලර් පනස්දාහක් විතර වෙනව

තව බනින්න කට හදන් හිටි ප්‍රධානියා ඇතිවුණු කුතුහලයෙන් මේම ඇහුව මො.කා.. 50,000ක්. උඹ අම්මගෙ පොරක්නෙ. මොනාද ඔච්චර එක කස්ටමර් කෙනෙකුට වික්කෙ

සර් එයා මුලින්ම ගත්තෙ බිලී කොක්කක්...

යකෝ කඩේ තියෙන බිලී කොකු ඔක්කොම වික්කත් එච්චර ගානක් ගන්න බෑ නෙ. තමුසෙ මක්ක කරලද ඒ මිනිහගෙන් 50,000ක් කඩා ගත්තෙ. මට ඇත්තම කියනව

එක බිලී කොක්කක් මදි නේද කියල මං එයාට බිලී කොකු පෙට්ටියකුයි, බිලී පිති දෙකකුයි, ඇමට ගන්න පණු බාස්කට් එකකුයි විකුණුව

ඒත් 50,000ක් එන්නෙ නෑනෙ ජයමහ.....

ඒ කරලා මං ඇහුව ගඟ මැදට ගිහින් මාලු බාන්න කැමති නැද්ද කියල. ඒකට අඩුව බෝට්ටුවක් ගන්න එන්න කියල එක්කං ගියා අපේ බෝට්ටු යාඩ් එකට. බෝට්ටු පැද්දොත් රෑ වෙන නිසා මං කූඩාරමකුත් ගන්නත් අදහසක් දැම්ම... රෑට සත්තුන්ගෙන් බේරෙන්නත් එපෑ

ඊට පස්සෙ බඩු ටික එලියට අරං යනකොට තමා මිනිහටත් තේරුණේ එයා ආහු වාහනෙට මේ ගත්ත බඩු ටික දාන්න ඉඩ මදි කියල. පස්සෙ මං තවත් හොද අදහසක් එයට දැම්ම. ආපු වාහනේ විකුණලා බෝට්ටුවයි බඩු ටිකයි ගෙනියන්න පුලුහං... ඒවටම හදපු වාහනයක් ගත්තනම් කියල. ඊට පස්සෙ තමයි මිනිහ අපේ වාහන සෙල් එකෙන් වාහනයකුත් අරං ගියේ.

ආතභූත වුනු ප්‍රධානියාට නිකම්ම කියවුනා... තමුසෙ එහෙනම් බිලී කොක්කක් ගන්න ආපු මිනිහෙකුට මාලු බාන රස්සාවට ඕන හැම දෙයක්ම ගන්න සැලැස්සුව

ස.ර්... එයා ඇත්තටම අපේ සුපර්මාර්කට් එකට ආවේ බිලී කොකු ගන්නවත්, මාලු බාන අදහසකින්වත් නෙමේ. පොඩි හිසේ අමාරුවකින්

මොකා.. එතකොට තමුසෙ කොමද හිසේ අමාරුකාරයෙක්ට මෙච්චර බඩු තොගයක් වික්කෙ

හිසේ අමාරුවට මොනාහරි බේතක් ගන්න මිනිහ ඇවිත් තිබ්බේ. මායි එයාට හිසේ කැක්කුම, මානසික ආතතිය... ඔය හැම දේටම මාලු බාන එක හොඳයි කියල මේ හැම බඩුවක්ම එයාට ගන්න සැලැස්සුවේ

තමුසෙ මාර මිනිහෙක්නෙ... ජයමහ. මොනාද මෙහෙට එන්න කලින් කරේ

මං ලංකාවෙ ප්‍රයිවෙට් හොස්පිටල් එකක ඩොක්ටර් කෙනෙක් විදිහට වැඩ කළා සර්..  පොඩි හෙම්බිරිස්සාවකට එන ලෙඩාට බ්ලඩ් ටෙස්ට්, යුරීන් ටෙස්ට්, සීනී ටෙස්ට්, ECG, CT ස්කෑන්, X-ray, MRI ස්කෑන් කරවන අපිට මෙව්ව සුලු දෙයක් සෑ.ර්..

අයිසෙ ජයමහ.......

තිර රෙදි

රෙදි කඩේකට ගිය ගොඩක් ලස්සන ගෑනු ළමයෙක්.... මුලු කඩේම ඇදල, පෙරලලා පැයකට පස්සෙ රෙද්දක් තොරගෙන එතැන කොල්ලට කිව්වා ‘මේකෙන් අඩියක කෑල්ලක් දෙන්න’ කියල. මේ පොඩි රෙදි කෑල්ලට පැයක් ගත්ත නිසා කේන්ති ගිය කොලුව ‘එච්චර පොඩි ජනෙල් නෑනෙ’ කියල සද්දෙට කිව්වා.

මේක මගෙ කම්පියුටරේට... කෙල්ල එහෙම කිව්වහම කොල්ල ඇහුව ‘ඒත් කම්පියුටර් වලට තිර රෙදි ඕන නෑනෙ’ කියල. ආයෙම කෙල්ල කිව්වා.

එකේ තියෙන්නෙ windows අලුත්ම එක කියල ගන්න තැනින් කිව්වෙ.

 

Keybord

ඔන්න කෙල්ලෙක්... ඉස්ස ඉස්සෙලාම කම්පියුටරයක් ගත්ත අඳුරන කඩේකින්. ඒත් වැඩි වෙලාවක් යන්නත් කලින් කෙල්ල key bord එක්කත් ඇන්න ආපහු අර කඩේට මංගැච්චුව. ‘අයියෙ මේකෙ keys අඩුයි නෙව ’. තක්බීරි උන කඩේ කොලුව ඇහුව මොන keysද නංගි දැන් මේකෙ නැත්තෙ......

කම්පියුටරෙන් කමාන්ඩ් එකක් ආව Any key එකක් press කරන්න කියල. කෝ ඒක මේකෙ නෑ නෙව.

 

One-way

ඔන්න ප්‍රවුත්ති බල බල හිටපු මහත්තය දැක්ක one-way එකක block එකක් නිසා පැයක් තිස්සෙ මාර්ග තදබදය තිවෙලා කියල මුළු කොළඹම. ඒත් එක්කම මහත්තයට මතක් උනා තමුන්ගෙ බිරිඳත් ඔය පැත්තෙන් නේද දැන් යන්නෙ කියල. විගහට ගත්ත phone call එකක්. බබී ඔය පැත්තෙ මාර trafficලු නේද...

ඒක තමයි බබා... මාව pass කරන ඔක්කොම vehicle අනික් පැත්තට drive කරනවනෙ. පාරම block

 

කාන්තා පොලිස්

ඔන්න ලස්සන තරුණියක් දවසක් කාන්තා පොලිස් vacancy එකකට apply කරලා හිට interview එහෙකට මූණ දුන්න. ලස්සන උනාට මොකද මේ කෙලී වැඩිය ඉගෙනුමට තැන දීල නෑ නෙව. ඔන්න කෝම හරි දැන් interview එකේ ප්‍රස්න වටය. මුල්ම පුරස්නය - ‘ලෝකෙ මුල්ම බැටන් පොල්ල හොයා ගත්තෙ කවුද?. කෙල්ල කම්පනා කරලා මෙහෙම උත්තරයක් දුන්න.

එක මුලින්ම නැති කරගත්ත පොලිස් නිලධාරියා. දෙවැනි ප්‍රශ්නය - ලෝකෙ වැඩිම අපරාධ සිද්ධ වෙන රට? එකටත් කෙල්ල කම්පනා කරලාම ලඟින් යන උත්තරයක් දුන්න. ‘හ්ම්... අපේ රටනං වෙන්න බෑ නේද. රටත් පොඩිනෙ’ interview කරන අය තීරණය කරා තව එකක් අහල කෙල්ලව යවනවා කියල හිට. ‘හරි කියන්න බලන්න ඒබ්‍රහම් ලින්කන්ව මැරුවේ කවුද කියල ’. කෙල්ල අවංකව එකට උත්තරය දුන්න... මං දන්නෙ නෑ කියල. Interview bord එක කිව්ව හරි එහෙනං ගෙදර ගිහින්ම ඒ ගැන හොයාගන්නකො කියල. කෙල්ල සතුටින් ගෙදර ගියා. මගදී යාලුවෙක් හම්බෙලා විස්තර ඇහුව... ‘මොකද උනේ ’

මාව බඳව ගත්ත අනේ... ඒ විතරක්ද ඒබ්‍රහම් ලින්කන්ගෙ criminal case එකත් මට භාර දුන්න

 

ඉරට යන වෙලාව

මේත් අර විදිහටම Interview ගිය කෙල්ලෙක්... තැන අභ්‍යවකාශ මධ්‍යස්ථානයක්. මේවගේ තැන්වල වෙනස් විදිහෙ පුරස්න නෙව අහන්නෙ. මේ කට්ටිය ඇහුව ඉතීම් කෙලී ගෙන්.... ඔයා ගගනගාමියෙක් වුණොත් මොකක්ද දියත් කරන්න කැමති වැඩසටහන. කෙල්ල ගත්කටටම කිව්වා... මං කැමති ඉරේ පය තිබ්බ මුල්ම කෙනා වෙන්න කියල. කට්ටිය පුදුමයෙන් ඇහැව්ව ඉතින් ඔය ළමය දන්නෙ නැද්ද ඉරට ලං වෙන්නවත් බෑ ඒකෙ රස්නෙට කියල. කෙල්ල කිව්වා මං ගාව ඒකට හොඳ සැලැස්මක් තියෙනවා කියල. කට්ටිය ආයෙත් පුදුමයෙන් ඇහැව්වා මොකක්ද ඒ කියල.

මං ඉරට ගොඩබහිනවා රෑට... එතකොට හරිනෙ.

 

ගිනි නිවන්න එන්න

තව දවසක් කෙල්ලෙක්ගෙ සුළු වරදකින් මුළු ගෙදර ගිනි ගන්න උනා... මේ උය උයා ඉන්නකොට. කෝම උනත් මොළේ පාවිච්චි කරලා මේ කෙල්ල ගිහි නිවන අංශයට කෝල් කරලා හිට විස්තරය කිව්වා. ගිනි නිවන අය ඇහුව - මැඩම්, ඔයා කොහොද ජීවත් වෙන්නෙ?. දැන්නම් එලියෙ. ගිනිගන්න කලින් නම් ජීවත් උනේ ගේ ඇතුලෙ.. කෙල්ල ඇත්තම කිව්වා. ගිනි නිවන උන්ට තේරුනා කෙල්ල කම්පවුස් වෙලා මේ වෙලේ කියල ආයේ ඇහුව... මැඩම් අපි එනවනම් ඔතැනට කොහොමද එන්නෙ කියල. කෙල්ල කිව්වා.....

වෙන ගිනිගන්න තැන් වලට යන විදිහටම එන්න. අර ලොකු වතුර බව්සරෙත් අරං

 

News බැලීම

යාලුවෙක් දවසක් ගෙදරට ආපු කෙල්ලෙක් එක්ක ඔට්ටුවක් දැම්ම. මේ අර breaking news වල පෙන්නන මිහින ඔය වහලෙන් පනිනවා... දාහක් ඔට්ටුයි. එහෙම කිව්වම කෙල්ලත් හරි මාත් ඔට්ටුයි. පනින්නේ නෑ කිව්වා. ඒත් වහලෙ හිටපු මිනිහ ටික වෙලාවකින් පැන්න. ඔට්ටුවෙන් පැරදුන කෙල්ල සල්ලි යාලුවට දුන්න. ඒත් යාලුව ඇත්තම කිව්වා. මේක උදේ ගිය news එක්ක රිපීට් එකක්. මේ සල්ලි ඔයාම තියා ගන්න... බොරු කරන්න හොඳ නෑනෙ. ඒත් කෙල්ල කිව්වා...

කමක් නෑ ඔයා සල්ලි තියා ගන්න. මාත් උදේ news බැලුව. මං හිතුවෙ නෑ මිනිහ දෙවෙනි සැරෙත් වහලෙන් බිමට පනී කියල.

 

At last!

මේ කතාව ඇවිත් බොහොම ඈත යුගයෙ පිටරටක කතාවක්. ඔය උපත් පාලනයට විරුද්ධ ආගමික පරිසරයක තමයි මේ මරිය හිටියෙ. මරිය ළමයි හදල... මරුනේ නැති එක විතරයි. ළමයි දුසිං ගණනක්. විවාහ දෙකක්. කෝම උනත් මරිය කාලයක් ඕම ඉඳල මැරුණා. දැන් ඔන්න ආගමික වතාවත් කරන මොහොත... පල්ලියේ. පූජක දීර්ඝ අනුසාසනයකට පස්සෙ දෙවියන්ට කන්නලව් කරමින් ඉඳල සභාවට දේව වාක්‍යයක් කිව්වා. At last, they are finally together." කියලා. මේ ඉතින් පිටරටක් නෙව.

එතැන හිටපු ආගමට ලැදි කේලං කියන  කාන්තාවක් ඇහුව... පාදිලි උන්නාන්සේගෙන්. ‘පූජකතුමනි ඔබ අදහස් කලේ පලවෙනි මිනිහද, දෙවෙනි මිනිහද එහෙමත් නැත්තං...

නෑ නෑ මං අදහස් කලේ මරියාගෙ කකුල් දෙක......

Read More

 

 ඉතීම් හිතෝතුනි මේ පත්ව ඇති සරුව පක්සි පාන්ඩුවෙන් දුන්නු පළමු හා දැවැන්ත සහනය තමා.... ඔය තෙල් ලීටරයකට සුපියලක්ය කියන සහන පැකේජය. ඒත් මේ පැකේජය බූලි වලට හම්බු නොවෙන බවයි තරුණ ඇමති අවධාරණය කරන්නෙ... තරයේම. (තාම පැඟිරි විසේ වෙන්ටෑ) දවසකට ලංකාවේ ලීටර කී කෝටියක් ගහනවාද... හිටන්. එහෙම බැලුවොත් අපේ තරුණ ඇමති, රනිල් අගමැති ඇතුළු සරුව පක්සි පාන්ඩුව දරන පාඩුව සුළුපටු ද පිංවතුනි... නෑ. ඒක පපු කවුත්තටම දැනිච්ච පිරිසක් සෙඩ් එකක් ගාව කැට තියල.... ඒ පාඩුව පියවන්න සුපියල සුපියල එකතු කරන්නත් කටයුතු කරලා තිව්නයි කියන්නෙ.

අගමැති උනු රනිල්තුමත්... මං ආවේ වැඩකරන්න, ගොඩදාන්න කිව්වට තාම ගොඩදාපු දෙයක් දැකපු කෙනෙක් නැති තරං. නන්දලාල් උන්නැහෙත් බැංකු පුටුවට ආවේ මං ගොඩදාන්නං කියාගෙන. ඒත් පහුව හුළං බැස්ස... යන්නත් අදහස් කරනවය කිව්වෙ. ඒ මදිවට හිටි අයම ආපහු ඇමති පදවි වල. හරීන් නම් තාත්තගෙ අදහසුත් විමසල අහක බලං තමා පත්වීම අරං තිව්නෙ... රට වෙනුවෙන්. බැලිනං ගෝඨා හාමු අස්පස් කරන්න, මකුළු දැල් කඩන්න තමා කැබිනට්ටුව එහෙ මෙහෙ කරලා තියෙන්නෙ. කෝ ඒකට ඉතීම් උදව්වක්වත් දුන්නෙ නෑනෙ ලැජ්ජ බයට හැදුන සජිත් පුතානෝ.

හැබැයි ඉතීම් මේ ඵල නොදරන 225 සැට් එකෙන් මාධ්‍ය සාකච්ඡා තියල කතානම් පැවැත්තුවා දිවා රෑ නොබලා. එහෙම උනාට රටේ තෙල් හිඟ ඇති කොටත් පක්ස රැස්වීම්, කතානායක හමු, අභ්‍යන්තර සාකච්ඡා මේ හැම එකටම දුව ඇවිදන් මේ කස්ටිය තෙල් නහත්තිකරේ තම තම දේසපාළන අනාගතය වෙනුවෙන්... නෙවේ රට ගැන හිත් ලාල. මේ ඇතුළු රටේ කිසි  පුරස්නයක් ගැන හරියට කතා නොකෙරු බහුතර මාධ්‍ය ආයතනයත් කියව කියවා කාලේ නහත්තිකරේ... රට ගැනම හිත ලාල.

ඉතීම් වෙසක් සිරි... ගිය වාරේ වගේ නැතිව, මේ වාරේ අපිට දුන්නෙ අප්පච්චි වහන්දෑමයි. ගිය වාරේ නෝනි බැති ගී දුන්න. මේ වාරේ අප්පොච්චි තොරන් රාජය ප්‍රදර්සනය කළා.... රටටම වෙසක් සිරි කුළු ගැන්වෙන්න. ජාත්‍යන්තරෙත් ඇහැ ගැටිලයි නතර උනේ. තොරණට පාදක උනු කතා වස්තුව ‘ගිනිතිව් හනුමා’. මේ කතාවෙන් අපිට දර්මය ප්‍රායෝගිකවම දැනෙන්න දුන්න... අප්පොච්ච. වඩාත්ම පිංවතෝනි, දිට්ඨධම්මවේදනීය කරුමය ගැන. ඒක දැක ගන්න පුළුවන් උනේ තොරණේ පහල තිව්නු කොටු කීපයකින්.... මේ ගැහුවා, මේ රිටර්න් එක ලැබුන ගෙවල් වලට යන්නත් කලියෙන්. ඒත් උඩහම කොටුවල ඉන්න අයට වෙන දේ ගැන තාම වගක්වත් තොරණේ ගෑවිලා තිව්නෙ නෑ. කෝම උනත් ඉතීම් සෑම කිරියාවකටම හේත්තුවූ ඵලයක් තියෙනවා නෙව. පහුව තැපෑලෙන් හරි ලැබෙන්න තියෙන දේ ලැබෙනවා... රජය මේ වෙසක් මාසෙ වෙනුවෙන් ජහමනයාට ඉදිරිපත්කල තේමාව තමයි ඒ.

සාතිසය බහුතර ජනයා රට හැදෙන්න ඕන කිව්වට.... ඒකට ලැහැත්ති ද?. විභාග ලියන සමහර දරුවන්ටත් යන්න නොදී වෙච්චි සමහර උද්ඝෝෂණවල හඬ, රටකරන මහතැන් වලට දැනෙයිද. ඇහෙයිද. අපි අපිම ගහගෙන, ඇන කොටාගනිද්දි... අපිට ලැබෙන අවසන් ප්‍රතිඵලේ මොකක්ද?. ඒත් මොක හිතන්නත් තේරුම් ගන්නත්... බඩේ, හිතේ ගිනි තියෙන උදවියකට පුලුහං වෙයිද. ඒක නිසා නෙවෙ බුදුහාමුදුරුවො පවා කීවේ බණ දෙසන්නත් කලින් අහන උන්දලා බඩ පුරවාන ඉන්න ඕනෑය කියල.

තා පැත්තකින් යන කතාවක් තමයි දූෂිත නිලධාරි රැල නිසාත් මේ රට ගොඩ ගන්න බැහැය කියල. ඒක සක් සුදක්සේ පැහැදිලි කාරණයක් උනත්..... මගේ මතකෙට ආවේ එහෙව් දෙයක් කරන්න හදාපු වංචා පිටුදැකපු හිටපු නියෝජ්‍ය විගණකාධිපති නිලධාරියෙක්... ලලිත් අඹන්වල. අපේ ලොකු තැන් ඇතුළු ජහමනයාම නෙව උන්දට ඇසිඩ් වක්කොරලා හිට පන්න ගත්තෙ. මේත් අපිට නොපෙනෙන පැත්තක්... එතරම්ම මේ ක්‍රමය ජරාජීර්ණ, වැහැරුණු එකක් වෙලා නෙව.

ඒ. එච්. එම්. ලලිත් අඹන්වල

පෝලිමේ ඉන්ට ආස නැතිව පෝලිම් පනින්ටම කැමති පිරිසක් වෙච්චි අපි. එහෙම තියාන වෙන උන්දලා අපිව පාස් කරාන යනකොට තමයි අපට සාධාරණය, නීතිය මතක්කා වෙන්නෙ. ඇඟේ ලේ කුපිත වෙන්නෙ.

මේ ටිකේ දැන්... පහේ විභාග ලිව් ළමයි ඉක්කෝල වලට දාගන්න ගහන ගැට හා ලොකු තැන් ඉදිරියේ නැවෙන්න සුදානං දෙමව්පියො පහුගිය ටිකේ system change ඉල්ලාන කෑ ගැහුව අය අත‍ර හිටියේ නැද්ද මන්ද. ඔය අතරේ සමාජ මාධ්‍යයේ හුවමාරු වෙන කතාවක් තමයි “දකින්න අවස්ය වෙනස තමන් තුලින්ම ඇති කර ගන්නය” කියලා කියන වැකිය.

ආයේ තව පැත්තකින් කොරෝනා, අරගල, lockdown, තෙල් මිල ඉහළයාම් අස්සෙත් ගෝලීය උෂ්ණත්වය එන්න එන්නම වැඩි වී තියේ... කියලා කියන්නෙ. තව දසකයක් දෙකක් වගේ යනකොට... දැන් අපි වතුරට ගෙවා ගන්නැහේ හුස්ම ගන්න එකටත් ගෙවන්නට වේවි. එදාට හුස්ම දෙන ටැංකි ගන්නත් මේ දැන් තියෙන විදිහේ පෝලිම්... පාලකයන් එදාටත් පවත්වාන යාවි. අපි එදාටත් ගහගනීවි. වෙසක් සමරාවි. ඒ අතර නාමල් රජ වී, දැන් ඇමැතිලාගේ මුනුපුරෝ ඇමති වී ඉන්ටද පුලුහං වේවි. කෝම උනත් හමෝට්ටම සුබ අනාගතයක් !

Read More

 සහස්‍රකයෙන් ලැබීමෙන් පස්සෙ ආ සුපිරි ෆිලුම්ක් තමයි ඉතින් Training Day (2001) කියන්නෙ. Denzel Washington... ලෝක සිනමාවට කැමති කවුද නොදන්නෙ මේ බුවා ගැන. Glory, Fence, Equalizer, Inside Man, Philadelphia... ආදී චිත්‍රපටිවල දැනෙන චරිත කරපු Denzelගෙ Oscar සිහිනය සැබෑ වුණේ මේ චිත්‍රපටියෙන්. මෙහි Denzel නිරූපණය කරන්නෙ පරීක්ෂක ඇලන්සෝ නැමැති කළු චරිතය වන අතර Ethan Hawke නිලධාරී Jake විදිහටත් ඒ කාලේ කොල්ලන්ගෙ crush එකක් උන Ryan Gooslingගෙ කලින් නෝනා... Eva Mendes ඇලන්සොගේ කෑල්ල Sara විදිහටත් තමා. සෙසු චරිත වලින් Snoop Dogg හා Cliff Curtisවත් දැක ගන්න පුළුවන්. ඒත් මුලින්ම මේ චිත්‍රපටයේ ඇලන්සො සඳහා Samuel L. Jackson වත්, Jake සඳහා Matt Damonවත් තමයි, කලින් අධ්‍යක්ෂක තෝරන් ඉඳලා තියෙන්නෙ. පසුව Paul Walker හා Eminem පවා Jake සඳහා සලකා බලල තියෙනව. කොහොම උනත් ඇලන්සො වෙනුවෙන් Denzelව ගැනීම වෙච්ච හොඳම දෙයක් හැටියටයි තේරෙන්නෙ... චිත්‍රපටිය නැරඹුවට පස්සෙ. ඒ තරම්ම විශිෂ්ට රංගනයක ඔහුගෙන් දැක ගන්න පුළුවන්.

පැය 2ක් පුරාවට දිවෙන අපරාධ/ ත්‍රාසජනක ගණයේ සලරුවක් වන Training Day (2001)හි අධ්‍යක්ෂ Antoine Fuqua වන අතර පිටපත David Ayer. IMDb හි 7.7ක අගයක්ද, Rotten Tomatoes වල 73% ලෙස rating කිරීම් වලින් ලබාගෙන තිබුණු අතර සිනමා උළෙලවල් රාශියක... හොඳම නළුවා ඇතුළු සම්මාන බොහොමයක් දිනා ගැනීමත්, හොඳ ප්‍රේක්ෂක ප්‍රතිචාර ලබා තිබීමත් චිත්‍රපටයේ විශිෂ්ට බව පෙන්වා දෙනව.

චිත්‍රපටියේ plot එක නම්... උසස් වීමක් බලාපොරොත්තුවෙන් තම එක් දින පරීක්ෂණයට/ඇගයීමට ලක්වන නිලධාරි Jakeට ඒ දවස තුළ මුහුණ දීමට වන සිදුවීම් පෙළයි. ඔහුගේ පරීක්ෂකයා වන්නේ මත්ද්‍රව්‍ය නාශක උසස් නිලධාරී Alonzo. Jake තමන්ගේ පරීක්ෂණය කාර්යාල භූමියෙන් පටන් ගැනෙයි කියල හිතුවත්, එය වෙන්නෙ දවස පුරාම උසස් නිලධාරී Alonzo සමග ලොස් ඇන්ජලීස් වටා කරක් ගැසීමෙන්. දවස ආවසානයේ Jake පරීක්ෂණය සමත් වෙයිද? තමන්ගේ ඉලක්කයට යයිද? නැතිනම්....

ජාවාරම්කාරයින්, මත් වෙළෙන්දන්... නීතියේ රැහැනින් ගැලවෙන්න දරන භයානක හා සාර්ථකම වෑයම වෙන්නෙ නීතිය කරවන අය තමන්ගෙ දැලේ දමා ගැනීමෙන්. ඒ දැලට හසුවන පොලිසියේ පහළම තැන ඉඳල ඉහළම නිලධාරියාත්, නීතිඥයින්, රහස් පරීක්ෂකවරුන් සතුටු කරන්න... මේ අපරාධකාරයන්ට සිදු වෙනව. කවදා හෝ මේ භයානක සූදුව නතර වෙන්නෙ දෙපැත්තෙන් එක පැත්තක කෙනෙක් හෝ පිරිසක් මරු වැළඳ ගැනීමෙන්. එතෙක් ගෙවෙන මේ අන්තර් කාලය, දෙපිරිසටම සටන් විරාමයක්. මේ කාලය තුළ දෙපිරිසම තම තමන්ගෙ ආදායම් මාර්ගය වන රැකියාවේ නිරත වෙනව.

පහළ නියම ලෝකයට බැහැල නැති Jakeට, හතරදිග්බාගෙම කරක් ගහපු Alonzo... පෙන්නලා දෙනව එහි කටුක යතාර්ථය. ඒ යතාර්ථයට මුහුණ දෙන්නට Jakeට සිදු වන්නේ තම අවංක පොලිස් හදවතත් එක්ක. මත් උවදුරින් තොර සමාජයක්, අපරාධකරුවන්ගෙන් තොර නගරයක් පතන Jakeට අමාරුවෙන් නමුත් තේරුම් යනව, තේරුම්ගන්න වෙනව මේ දූෂිත සමාජයේම /යාන්ත්‍රණයේම කොටසක් බව, නගරය ආරක්ෂා කිරීමට සිටිනා කණ්ඩායමත් කියා.

එක් පසෙකින් Alonzoට තමුන්ගෙ ජීවිතය ආරක්ෂා කර ගන්න, නියමිත වෙච්ච මුදලක් හොයා ගන්න සිද්ධ වෙනව. ඔහු ඒ ඉලක්කය වෙත සැලසුම් හදනව. ඒ පසුපස හඹා යනව. අනෙක් පසින්... මේ ජරාජීර්ණ වූ ලෝකයේ පය නොතැබූ Jakeට සිද්ධ වෙනවා තම හෘද සාක්ෂිය, නීතිගරුක බව හා නිර්දෝෂීභාවය ආරක්ෂා කර ගැනීමට කටයුතු කරන්න, සටන් කරන්න.

එක දවසක මෙතරම් සිදුවීම් සිදු වෙන්නට පුළුවන්ද කියන කාරණයත් සමග චිත්‍රපටය යතාර්ථවාදී බවෙන් මදකට ඉවත්ව තිබෙනා බවක් පෙනුනද... විය නොහැකි දේවල් නැති තරම් බව පෙනෙන යතාර්ථ ලෝකයත් සමග එය අහෝසි වෙනව. අනෙක් ගැටලුව වන්නේ ඇලන්සෝ නැමැති කළු චරිතය (bad guy) සඳහා කළු (coloured) පුද්ගලයෙක්මත්, සුදු චරිතය සඳහා (white man) සුදු කෙනෙකුත් තෝරා ගැනීමයි. (අධ්‍යක්ෂක Fuqua පවා කළු ජාතිකයෙක්). මෙයට පිළිතුරක් සොයාගත හැක්කේ චිත්‍රපටය නිපදවූ අයගෙන්ම නිසා ඒ කරුණත් අතහැර දැමු පසු... ඇහිපිය නොගසා බලන් සිටිය හැකි පැය දෙකක් ප්‍රේක්ෂක අපට ඉතුරු වෙනව... සමාජයේ තවදුරටත් සිදුවන හොරා සහ පොලිස් සෙල්ලමේ... තවත් එක් ආකාරයක් දැක බලා ගැනීමට.

Read More

 

දාසක් දා බූරුවෙක් තමුන්ගේ දවසෙ වැඩ list එකට කොටියෙක් මුණ ගැහීමට හා ඌත් එක්ක පොඩි chat එකක් කරන්න ඕන කියන එකත් දා ගත්ත. වැඩේ දා ගත්තා වගේම මේ බූරුවා දවාලේ ගියා කොටියා සම්බුවීමට.... ඌ lunch එක අරං ඉන්න වෙලාවක. මද සතුටු සාමීචියකින් පස්සෙ....

බූරු පුතා කොටියාට කිව්වා - තණකොළ නිල් පාටයි.

කොටියා ප්‍රති වදන් දුන්නා - නෑ... බූරු වහන්දෑ. තණකොළ, කොළ පාටයි.

මේ කතාබහ උණුසුම් වුනා... දෙන්න සමථයකට ආවෙම නෑ. කොච්චර වාද කර ගත්තත් දෙන්නගෙන් එක්කෙනෙක්වත්, අනෙක් කෙනාගේ මතය පිළිගන්න කැමති උනේම නෑ. බැරිම තැන දෙන්නම එක තීන්දුවකට ආව... කැලේ king වෙත ගෙහුං මේ අර්බුදය සමථයකට පත් කර ගනිමුය කියලා හිට. ඒ කරලා මේ දෙන්න කැලේ මහ රජා වන සිංහයා වෙත ගියා... එයාත් තම රාජ භෝජනේ අරං ඉවර උන time පහු වෙන්න ඇරලා.

සිංහයා තමන්ගේ ගුහාවේ එළිපත්තට වෙලා ඉඳගෙන හිටියෙ.... මේ ඩබල එන මොහොතේ.

බූරුවට, සිංහයා ගාවට ලං වෙන්නත් කලින්ම ඉහිලුම් නැතුව ගියා. “රජතුමනි, තණකොළ, නිල් පාටයි නේද ?" මහ හඬින් කෑ ගැහුවා.

සිංහයා වැඩි හිතාමතා බැලීමකින් තොරවම ආන්සරේ දුන්න... හිස උඩහටත් හා පාතටත් හොලවමින්.

මේ උත්තරයත් එක්ක බෝම සෑහීමට හා සතුටට පත් උනු බූරු තඩියා, සිංහයාට ආයේ කෑ ගහමින් කියා හිටිය... “මේ බොරු කිව් බූරු කොටියට දඬුවම් කරන්නෙයි කියල හිට...”

සිංහයා ආයෙමත් වැඩි වෙලාවක් නොගෙනම දඬුවම් තීරණය කළා කොටියට.... වසරක නිශ්ශබ්දතාවයක්.

ඒ වෙලෙත් බූරුවා මහත් ප්‍රීතියෙන් හඬ නගන්න, දඟලන්න පටන් ගත්ත. ඒ විතරක් නෙවේ... තණකොළ නිල් පාටයි කියමින් කෑ මොර දිදී වනන්තරේ කරක් ගැහුව, හමුවෙන හැම කෙනෙක්ටම ඒ ගැන කියකියා.

දඬුවම පිළිගත් කොටිය, බූරුවා ගියහම බයාදු හඬින් සිංහයාට ලංව ඇහැව්ව “රජතුමනි, ඒත් තණකොළ, කොළ පාටයි නේද? ” කියල. ඒවෙලෙත් බොහොම සාන්තව හිටි සිංහයා හිස වනමින් ඔව් කියල සංඥා කරා.

කම්පියුස් උන කොටියා ආයෙම බයාදු හඬින්, තම කැලේ ඥානවන්ත රජුගෙන්  ඇහැව්ව “එහෙනම් ඇයි රජතුමනි මට දඬුවම් කලේ...? ” කියලා.

පුරුදු සාන්ත භාවයෙන් හිටි සිංහයා මෙහෙම පිළිතුරු දුන්න.

"ඇත්ත වශයෙන්ම තණකොළ, කොළ පාටයි... එකේ තර්කයක් නැහැ. ඔය ගැන බූරුවෙක් එක්ක වාද කර කර කාලය නාස්ති කරන්නත්, ඒ මදිවට ඔය කුණ්ඩවාලය මා ගාවට ගේන්නත් තමුසෙ කටයුතු කරා... එහෙම කරලා හිට තමුසෙ මගෙ නිදහසටත් බාධා කරා. ඔන්න ඔය නිසයි තමුන්ට දඬුවම් හම්බ වුණේ. සිංහයා සිංහලීලාවෙන්ම කියා හිටිමින්...

නරකම කාලය නාස්තිය නම්... සත්‍යය හෝ යථාර්ථය ගැන නොතකන නමුත් තමන්ගේ විශ්වාසයන් සහ මිත්‍යාවන්හි ජයග්‍රහණය ගැන පමණක් සලකන මෝඩයන්, උන්මත්තකයන් සමඟ වාද නොකිරීමට වග බලා ගන්න. කිසිම තේරුමක් නැති සාකච්ඡා වලට කාලය නාස්ති කරන්න එපා. තමා ඉදිරියේ දකින්නට තියෙන සියලුම සත්‍යය සාක්ෂි තේරුම් ගැනීමේ හැකියාවක් නැති අය වගේම මමත්වය, ද්වේශය, අමනාපය නිසා අන්ධ වෙලා ඉන්න අයත් ඉන්නවා. අවශ්‍ය වන්නේ අනවශ්‍ය ලෙස ඔවුන් හැම දෙනාම නිවැරදි කිරීමට යෑම නොව. තමා නිවැරදි වෙමින් තම ජීවිතය යහපත් කර ගැනීමයි...

කියලා කොටියට උපදෙස් කීපයකුත් ඥානවන්ත සිංහයා අන්තිමට ලබා දුන්න.

අවිද්‍යාව කෑගසන විට බුද්ධිය වැසී යයි. ඔබේ සාමය සහ සන්සුන්කම වඩා වටී.

මේ වගේ ලඟින් යන කතා දෙකතුනක් අසා තිව්න්ත්. මෙය පේශ් බුකියේ පල වූවක උපුටනයක් බව සලකනු මැනව.

Read More

 ආටා එක, වීල් එක, ත්‍රීවිලය, ටැක්සිය.... ඔය කියන නම් වලින් වරනගන වාහනය තමයි කවුරුත් දන්න ත්‍රී රෝද රථය. හප්පන් ගිය වාහනෙ ගැන අහපු පොලිස් උන්නැහේට, ආච්චි කෙනෙක් නම් කියල තියෙන්නෙ "මහත්තයෝ මාව රේඩියෝ එකක් හප්පං ගියා" කියලයි. ඒ උන්ද ඒ වාහනේ දැකපු තාලේ.

හන්දියක් හන්දියක් ගානේ තියෙන, ඕන පාරක් දන්න, මහ මග කරදරේකදි මුලින්ම එන කෙනා තමයි ත්‍රීවීල් මල්ලි.. නැත්තං අයිය. සමහර අයියල නම් ලෝකෙ කාල වතූ බීල ඉන්නෙ. එහෙං දැමිලි, මෙහං දැමිලි නිසා ගොඩ වෙලාවට අනතුරු, තදබදය වැඩි වෙන්න හේතුවක්ය කියල ආඬපාලි කියාගත්තු කස්ටියකුත් නැතුව නෙමේ... මේ අයට. කෝම උනත් එදිනෙදා ජීවිත වලට මේ අයගෙ උදව් නැතුව බෑ. ඒ අස්සෙ සමහර අයට මේ අයගෙන් උන ඇබැද්දිත් ඇති.... මටනම් ඉතීම් උදව් ලැබුන අවස්ථා හා අප්සට් seen වෙච්චි නැතිම තරම්. ඒ හින්ද මධ්‍යස්ථ මතයක මං ඉන්නෙ.. අඳුරන බුවාලත් මේ රස්සාව කරන එකේ වැරදි කියලත් බෑ නෙව. කොරියන් විභාගෙට පාඩම් කරන උන් ටිකකුත් හිටිය... කාලයක්.  සමහර උන් බැඳලා. Park එකේ ඉන්න ගමන් කොරියන් ඉගෙන ගන්නවා... පොත් බල බල. ඒ අතරෙ සුද්දන්ට හයර් යන්න  කතා කරනවා... come sir/miss. මීටර් හෑව්. යු වෙයා ගෝ....

          මට උන හොඳ වැඩ වලින් එකක් මේ -

ඒ කාලේ වැඩ කළ ඔපීසියේ වැඩකට කොහිදෝ ගොහින් ආපහු එනකොට පෝං එක ඒ ත්‍රීවීල් එකේ තියල ඇවිදින්. ඒ අස්සෙ හයර් එකේ ගාන දීල තිව්නෙත් අඩුවෙන් නිසා ඇඟේ මයිල් කෙලින් උනා... එකක් නෑර. හැබැයි උන්ද call කරපු ගමන් ගත්ත... අරං කීව, පෝං එක අහවල් කඩෙන් තියන්ටම් ගන්නෙයි කියල. එදා උන්ද ගිය පැත්ත බලං වැන්දෙ නැති ටික විතරයි ඉතීම්...

එක කාලයක් ආව කුෂන් සීට් අතුරාපු, ඇලුමිනියම් වැටවල් ලියවැල් වගේ වටේ දුවපු, තොරනකට නොවැඩි ගණනින් බලුප් වැල් ඇදපු, හයි පයි සමාන සවුන්ඩ් සිස්ටම් සතු වෙච්ච ත්‍රීවීල් යුගයක්. හරියට භවනක් වාගේ ඒවා. සමහර ඒවා නම් යකාගේ භවන සදිසි... මිනී ඔලුත් ගහල තිව්න. ඔය හැම වැඩකම යෙදුනේ ඉතින් තරුණ පිරිස තමා... උන්ගෙ කලාව එලියට ආපු විදිහ තමා ඉතින් ඒ. දැන්නං ඒ සුකුරුත්තං අඩුයි... ඒත් නැතුවාම නෙමේ. දැන් ඉතින් රත්තරං වටිනා තෙල් හොයාගන්නත් සෑහෙන කට්ටක් කන්න එපා.. ඒ වගේද spare parts වල ගණන්, service charge එහෙම.  ඒ නිසා වෙන්න ඇති කෙනෙක් මේම ගහල තිව්නෙ.

නන්දෙ ඔයා දීපු සැපට දවාලෙ තරු පෙනුනා...

  මේ කොරෝනා වලට ගහපු වදනක්... 

හදිස්සි ගමනක් යන්න, ගෙදර වයසක උන්දැව කොයි හරි එක්ක යන්න, ගෙදරට බඩුටික අරගන්න, බස් නැති දවසෙ/ වැහි දවසෙ ගෙදර යන්න, හොර ගමනක් යන්න... ඔය කියාපු නොකියාපු හැම ගමනටම ත්‍රීවීල් සහෝල ඕන වෙනව. අතරින් පතර සහෝදරියොත් ඉන්නව නෙව. ඒ විතරක් නම් මදෑ බොන තැනක ඝනපූර්ණය රකින්නත් උදව් වෙන වෙලාවල් තියෙනව... මේ සහෝල. ඒ අතර වලි, kidnap, මත්ද්‍රව්‍ය ප්‍රවාහනය ඇතුළු නානාවිධ දේවල වලට පවා සමහරක් අයගෙ සම්බන්ධය ඇදිල යනව.... ගෙවන සිල්ලර ජීවිතයත් එක්ක. මේ බොහෝ අයගෙ වැඩි දුර අධ්‍යාපනයක් නොමැති කම, දුරාචාරවලට යොමු වීම, පවුල් අසමගිකම, ජීවිතයේ සැලසුම් සහගත බවක් නැති කම නිසා... life එක එකම තැන. අද හම්බකරොත් අද කනවා. ඉතුරු තිව්නොත් හෙට වැඩ නෑ වගේ ජීවන රටාවක් තමයි... බොහෝ අයගෙ. ඒක දැන් ඒ අයට පත්තියන් වෙලා ඇට මිදුළු දක්වා. ඉතිං ගෙදර, පවුල තුළ දියුණුවේ කුඩාම ලකුණක්වත් දකින්න බැරි තරම්. ඔය අතරේ උපාදි ගත්ත, උගත් දැනුමැති අය පවා මේ ජොබේ නැතුවාම නෙවේ.

ඔහොම ජීවන ගමන් යමින් මුළු ජීවිතේම මහමග ගෙව් ත්‍රීවිල් උන්දලා කස්ටියකුත් ඉන්නවා නෙව.

අපිට අමතක උනාට මේ උපසංස්කෘතියත්... ලංකාව ඉන්නෙ කොතැනද කියල සලකුණු කරන්න දායකත්වය දරනවා.

එහෙව් විවිධ ජීවිත රටාවලින් වලින් නැගෙන වදන් තමයි අපට ත්‍රීවිල් පිටිපස්සේ ලියවිලා තියෙනවා දකින්න ලැබෙන්නෙ. මේ සමහර වදන් ඒ අයගෙ මුළු ජීවිතම විදහා දක්වන කැඩපත, ජීවන දර්ශනය වෙන්න පුළුහං... තමන්ගෙ අනාගත සිතුම් පැතුම්, බලාපොරොත්තු වෙන්නත් පුළුහං.

ඒ නිසා ඒ හැම වදනක් තුළම නොකියවුණු කතාවක් ඇති.. පිටුහින් වෙන්ට ලියාපු......

 

පිඹගෙන එන්නෙ ඉඹගෙන යන්නද

රුසියාවට වඩා ලොකුයි ඊරිසියාව

Masha Allah

වමෙන් ගියත් අපි දකුණේ

මං නැති දා සිතට දුකක් නුඹට නම් නැති

If you are Bad. I'm your Dad

රෝද තුනක් උඩ හීන ගොඩක් ඇත

හීන තිබුනට කෝටියක් අතේ නෑ එක රුපියලක්

මම ඇරලා යන්න හරිම සූරයා

මම රාජ කුමාරයෙක් නෙමේ ගමේ කොල්ලෙක්

ණයට හයර් යන්න සිතා රථයට ගොඩ වෙන්න එපා

කට්ට උනත් ආසාවෙන් කනකොට පට්ට

ගෙනාවෙත් නෑ ගෙනියන්නෙත් නෑ ඉන්නකං විතරයි යකෝ

කරුමේ ඩබල් පින සිංගල්

දවසක් ඒවි අපිත් අපේ හීන වලට යන

නැන්දම්මේ උඹත් එපා. උඹෙ දුවත් එපා

නැන්දෙ මාමෙ මේ අහන්න දුව බෑ අමතක කරන්න

ගුල්ල වැඩර් වෙන්නේ බාල ලීයෙදි විතරයි

අපිට හොරෙන් අපි විකිනෙන අමුත් රටක් මේක

අම්මා සඳක් වූ ලෝකෙ මුළු අහසම නුඹයි තාත්තේ

සෑම මවක්ම ලෝකයේ අනාගතය තම කුසේ දරා සිටී

කොලොම්පුරේ නුඹේ ගෙදර පහළ කාමරේ මාව තියා ගන්න බැරිද රත්තරං පුතේ

අම්මේ ඔබෙ ගුණ කීමට හෝඩියේ අකුරු මට මදි

මල් පිරි පොකුණත් කලකට කලින් මඩ වලකි

රුපියල් සත නිසාද අපිට මේ දුක

ලොවට බොරු කළ හැකි නමුත් තම සිතට බොරු කළ නොහැක

අවංකව සිනාසෙන්නේ කිරි දරුවන් පමණි

ළිඳ මගේ නම්, මං ළිඳේ නම් කාටවත් ඇයි වේදනා

සිංහලේ, දෙමළේ, මුස්ලිම් ලේ මිය ගියාම එකම වලේ

නුඹ ගඟක් වෙලා ගලන්න - මට හුඟක් වෙලා නාන්න

වයසට ගියත් - හවසට ගෙදර

අපිත් මාතෘකා, අපි නැති තැන්වල

ඔබ පහුඋනා නොවෙයි මා ඔබ පහුකලා

පුංචි අපිත් හරි ආසයි හයියෙන් යන්න

No Race - අම්මා Case

මාලේ ගෙලේ, චේ පපුවේ, කිසිම දෙයක් නෑ ඔලුවේ

අපිට හිනා වුණු අයට රෝද තුනක්වත් තිබුනෙ නෑ අම්මෙ

කොල්ලො ළපටියි - කෙල්ලො කපටියි

කාසි සද්දෙ දැම්මට නෝට්ටු සයිලන්ස් Bro

කට්ට කන්න බැරිනම් පට්ට හීන දකින්න එපා බන්

හැමෝම දාන වදන්වලින් අපි දැන් පදං වෙලා Bro

වේලි වේලි හිටියත් කෑලි කෑලි කැපුවත් හාල් කෑලි නම් එපා

ගමට බහිද්දි මිනිස්සු මාව අඳුරගන්නෙ වාහනේ සද්දෙන්

කොල්ලො කරුවලට බයයි නම් මෝහිනීට කොහෙන්ද ළමයි

දුව ගෙදර පහන නම් අපි ලයිටර්ද අම්මෙ?

සල්ලිම ජීවිතේ කර ගත්තට මිනී ඇඳුමෙ සාක්කු නෑ මහත්තයො

ගොලුවොත් කාතාකරයි ඇති දාට, කතා කරන අයත් ගොලුවෙයි නැති දාට

බොක්කෙන් ලව් කරපු කාලේ කෙක්කෙන් පොල් කැඩුවා නම් මම අද කෝටිපතියෙක්

කෙල්ලො ළඟ හිටියොත් හොටෙල් බිල්, දුර හිටියොත් ෆෝන් බිල්, දාල ගියොත් බාර් බිල්

රෝද තුනක් උඩ හීන ගොඩක් ඇත

අයිසැක් newton අපිත් දකින්නැති ගණන් හදන්නැති ඒ කාලේ, campus යන්නට ලකුණක් මදි ඇති ඒකයි තවමත් මහපාරේ

ඉගිලෙන්න තහනම් නම් දුරක් ඇයි දුන්නෙ මට ලයිසන් එකක්

ලොවේ විශ්වාසවන්තයින් දෙදෙනෙකි. එක් අයෙක් මියගොස් ඇත, අනෙකා ඉපදී නැත.

මා පසුකර යන රියදුරන්ට ත්‍රිවිධරත්නයේ පිහිටයි

මග හැරුණු අතීතයට වඩා ගොඩනගාගත් අනාගතය වැදගත්

අපිට පනින නයි, මුගටි හපා කයි

අපේම නයි අපිවම කයි

සෙවනැල්ල පවා සිටින්නේ ආලෝකය ඇතිවිට පමණි

හබලක්වත් නැති අපට නැව් ටෝක් මොකටද

ONLY ONE SUN SHINE FOR ALL

NO BODY HONEST IN THE WORLD

Oh Please Let me Come in Your Dream This Night

NO BODY HONEST IN THIS WORLD

assumption is the mother of all screw ups

කොච්චර ගස්සල පද්දල ගියත් අන්තිමට කුස්සිය තමා නංගි

ආදරය නැමැති මාලිගාවේ යතුර විශ්වාසයයි

හෝන් ගැහුවට පාර පළල් වෙන්නෙ නෑ හු##

සල්ලි ගස්වල හැදෙයි නම් කෙල්ලෝ වඳුරන්ටත් ලව් කරයි

සුදු මුහුණයි හුරතලයයි හරි අවදානම්

සම්බුදු සරණයි , එංජිම පරණයි

 

“ත්‍රීවීල් කරුවෝද මනුෂ්‍යයෝය”

 

 

ආයේ පත්තරේක දැක්ක මේ කවිය ත්‍රීවීල් එක්ක ගහල තිවන කියල...

මට මං වෙන්න මේ හොඳටෝම ඇති

මට ඌ වෙන්න තව ටිකක් මදි

ඒ ටික වෙන්න ජීවිතේ කාලය මදි

ඒ නිසා මට මේ ටික හොඳටම ඇති

 

මේ අස්සෙ තවත් blog වල ලියා තිව්න ත්‍රීවිල් පොස්ට් හතරක් හම්බු උනා... ඒවත් ඉතීම් කියවල බලන්ට.

 

ඉවාන් පවුලූශා -  කරුමෙ ඩබල් පින සිංගල් - මේකනම් පොඩි විග්‍රහයක යෙදෙනවා යෙදුන් සම්බන්ධයෙන්

පාඨයකාගේ පිටුව - ''අපිත් මාතෘකා, අපි නැති තැන්වල'' ( 'නූතන ප්‍රස්ථා පිරුළු' හෙවත් ත්‍රිරෝද රථ කියමන්)

සෑම්ගේ කතාව - ත්‍රීවීල් සහ පරිකල්පන මෙව්වා එක... SL Tuk Tuk Habits !!

වල් පල් - ත්‍රීවීල්,ලොරි සහ බස් අයියලාගේ කතා

Read More