කේන්තිය පාලනය කර ගන්න ඕන.. ඕන කියලා හිට උපදෙස් ලැබෙනවා නෙ අපට. ඒත් ඉතීම් කේන්ති නොගෙනත් බෑ සමහර වැඩ වලදි... වගේ නෙ. කෝම උනත් කේන්තිය නිසා ලස්සන අඩු වෙනවය, ඉක්මන් තීරණ ගන්නවය, හැමෝම ඒ නිසා නැසෙනවය කියල තමා තේරුම් බේරුම් ඇති උදවිය කියන්නෙ.

කේන්තිය එක්ක ගැටගැච්ච කතා තුනක් තිවන... ඉතින් ඔන්න ඔහෙ post එකක් විදිහට දාන්න හිතුන ඒ කතා තුන.

 

ගුවන් ගමනින් ඇතිවුන වෙහෙස නිසා, ඇය ඉක්මනින් ගෙදර ගිහින් මහන්සි නිවාගන්න කියල හිතාගෙන සීඝ්‍රගාමී දුම්රියට ගොඩ වුනා. ඇයගෙ යාබද අසුනෙ වාඩි වෙලා හිටියෙ ප්‍රියමනාප මහල්ලක්. ගමන පොඩ්ඩක් දිග නිසා ඈ තම අලුත් නවකතාව කියවන්නට හිතා ගෙන එය බෑගයෙන් එළියට ගත්ත. පොත ගන්න මොහොතෙ ඈට පොඩි බඩගින්නකුත් දැනුණ නිසා... මිල දී ගත් බිස්කට් පැකට් එකත් එළියට ගන්න හිතුණ. ඒ එකක්ම යාබද අසුනෙ හිටි ගමන් සගයා..... ඒ මහල්ලා බිස්කට් පැකට් එක කඩා ගෙන පළමු බිස්කට් එකේ රහ බලනවා. බෑග් එකත් ඇරලා ඒ විදිහටම තියෙනව. ඇයට ඉවසුම් නැතුව ගියා.

ඒත් එක්කම... ඔහු ඈ දිහා බලලා තම අත තිබුණ බිස්කට් පැකට් එක ඇය වෙත දිගු කළා. කේන්තියෙන් හිටියත් බඩගිනි නිසා ඈ බිස්කට් එකක් අරගෙන පැකට්ටුව ආසන දෙකට මැදි වෙන්න තිබ්බ.

දැන් දෙදෙනාම බිස්කට් මාරුවෙන් මාරුව කා... අවසන් බිස්කට් එක විතරක් පැකට් එකේ ඉතිරිව තිබෙන මොහොත. ඈ බලාගෙන හිටිය මේ බොරු ප්‍රියමනාප බවක් පෙන්වමින් ඉන්න කපටි මහල්ල අන්තිම බිස්කට් එක ගනීද, නැතිද කියල. මොහොතකින් ඔහු අන්තිම බිස්කට් එක අරගත්ත. ඒත් එක්ක ඈ මහල්ලා වෙත නපුරු මුහුණක් පෙන්වා තමන්ගෙ කේන්තිය පල කළා.

මහල්ලා, අතේ තියාගෙන හිටි බිස්කට් එක දෙකට කඩා ඇයට කෑල්ලක් දික් කළා. එයින් ඇගේ කේන්තිය මදක් අඩු උනත්, මහල්ලා කෙරේ තිබ්බ අකමැත්ත නම් අඩු උනේ නෑ. ඒ වගේම ඇය අතින් සංඥා කරමින් බිස්කට් බාගය එපා කියල කිව්වා. තමන් බහින ස්ථානයට දුම්රිය ලඟා වූ හැටියෙ, තමන්ගෙ නොරිස්සුම පේන්නනුත් එක්කලා ඈ මහල්ලාට ගස්සාගෙනම නැගිට යන්න ගියා.

ගමන් මහන්සියට නිසා ආ හැටියෙම ඈ ඇඳට වැටුණ. හවස නාගෙන ඇවිදින් බෑග් එක අස් කරන කොට ඈ දැක්ක තමන් මිලදී ගත් බිස්කට් පැකට් එක එහෙමම එහි තිබෙන බව.

ඇයට මහල්ලා ගැන පුදුම අනුකම්පාවක්, කරුණාවක් ඇති උනා. තමන්ගෙ බිස්කට් පැකට් එකෙන් කොටසක්, නපුරුකම් කළ තරුණියකට ලබා දෙන්න පවා ඔහු කෙතරම් හික්මුණු පුද්ගලයෙක් ද කියා සිහි වී. ඒ මුහුණේ ප්‍රියමනාප බව කොයිම නිසාවකවත් ඔහුගෙන් ගිලිහී නොගිය බව ඇයට මතකයන් අතරින් තේරුම් ගියා. තමන්ගෙ හදිසි වැඩ නිසා, වැඩි දුර හිතා මතා නොගන්න තීරණ නිසා... ඈ කම්පා උනා. ඒත් ඔහුගෙන් සමාව ගන්න බැරි බව ඇයට දැනුණ නිසා ලොකු දුකක් ද හිතේ හටගත්තා. ඒ වගේම ආයෙත් මේ විදිහට හොයා බලන්නෙ නැතුව ඉක්මන් තීරණ, හදිසි කෝප ගැනීම නොකරන්න ඇය වග බලා ගත්ත.

දවසක් තමන්ගෙ ‘චූටි දුව’ එක්ක සුපිරි වෙළඳ සැලට ගොඩ උන අගේ මව, බඩු තෝරා බලමින් හොඳම දේවල් මිලදී ගත්ත. ඒ අතර චූටි දුවට ඕන කරන සෙල්ලම් බඩුව වගේම කෑම බීමත් එතන තිබුණ. ඇය ගෙදර ඇවිත් බඩු අස්පස් කරන ගමන්, මිලදී ගත්ත ඇපල් ගෙඩි දෙක පෙන්නමින් ‘මටත් එකක් දීල ඔයත් එකක් කන්න’ කියල කිව්වා.

ඒත් දූ කර දෙයින් ඇයට හොඳටම කේන්ති ගියා. එක ඇපල් ගෙඩියකින් කෑල්ලක් කඩාගෙන කෑ චූටි දූ, අනෙක් ඇපල් ගෙඩියේ කෑල්ලකුත් කඩාගෙන කෑවා.

කේන්තියෙන් පාරක් ගහල ඈ ‘අම්මටත් එකක් දෙන්න කිව්වම දෙකම එක සැරේ කනවාද?’ කියල පොඩි තරවටුවක් කළා.

“මට ඕන උනේ අම්මට රසම ඇපල් ගෙඩිය දෙන්න. ඒකයි දෙකේම කෑල්ලක් කාල බැලුවෙ” කඳුළු අතරින් දූ, ඇයට අදහාගත නොහැකි කතාවක් කියමින් ඇයවත් හැඬෙව්වා.

 

* * * * * *

සාර ඉපදුණේ එක් ඇසක් අඳව. ඒ වගේම ඉපදී ටික දවසකින්ම සාරාවත්, අගේ මවත් තනිකරමින් අගේ බීමත් පියා ඔවුන්ව අතහැර ගියා. ඒ නිසා සාරව හදා ගන්න ඇගේ මව ගොඩක් මහන්සි උනා. සාරට තේරුම් යන කාලේ එනකොට තමන්ට අනෙක් ළමයි විහිළු කරන බව ඇයට දැනුණ. ඒ නො පෙනෙන එක ඇස නිසා. ඇය ගෙදර ඇවිදින් එදා හොදටම ඇඬුවා. අගේ මව නගරෙ වෛද්‍යවරයෙක් ගාවට සාරව අරන් ගියා. සාරට ටික කලකින් සැත්කමක් කරා. සාර වැඩිවියට එද්දී ලස්සන ඇස් දෙකම හොඳට පේන තරුණියක්.

ඒත් ඇගේ මව දැන් කාලයක ඉඳල එක ඇහැක් පේන්නෙ නැති අනෙක් ඇහැත් දුර්වර්ණවී ගිය, නිතරම වැරහැලි වලට හුරු උන කෙනෙක් බව සාරට එක් වරම හැඟී ගියා. සාර මවට පාසල ගාවට එන එක තහනම් කරා. ඇයට එය ලැජ්ජාවක් උනා. දවසක් මේ නිසා සාර මවට හොඳටම දොස් කිව්වා. ඒත් දැන් ඇයට වැඩි මතකයක් ද නැති නිසා සාරට තවත් කේන්තියි.

එදා රෑ සාරගෙ මව මියගිහින් තිබුණා. ඇයගේ ලාච්චුවේ තිබී සාරට අවුරුදු 10කට කලින් මව ලියූ ලියමනක් හමුවුනා.

“සාර නිතරම ගෙදර එන්නෙ දුකෙන්. ඈ ඉපදුණු දා පටන් දුකින්. අද හමුවූ ලොකු දොස්තර මහතා කිව්වා ඇහැක් කවුරු හෝ පරිත්‍යාග කරනවා නම් සාරට ආලෝකමත් අනාගතයක් ලබා ගත හැකි බව. මං ඒ නිසා තීරණය කරා... මගේ ඇහැක් ඇයට ලබා දෙන්න.”

සාර හැඬූ කඳුළින් තමන්ගේ වැරදි හැසිරීම් සිහි කරන්නට උනා. තමා දැන් හඬන්නේ ද මවගේ ඇසක උපකාරයෙන් නේදැයි කියා ඇයට තේරුම් ගියා. ඒ නිසා ඈ බොහෝ කම්පා උනා.

බස්සාත් මේ ටික දොහේ අන්තර්හාන වෙලා හන්ද මංවත් යූ බටේ videoවක් බලන්නට දාන්නම්... ඔහෙල්ලට J

Read More

 නත්තල් සීය

එක දවසක් තෝමස් අල්වා එඩිසන්, හෙන්රි ෆෝ(ර්)ඩ් සහ හාවේ ෆය(ර්)ස්ටෝන් යන මිතුරන් තිදෙනා ගමනක් අතරතුරේදී පිරවුම් හළකට ගොඩ උනා වාහනයට ඉන්ධන ලබාගන්න. වාහනයෙන් එළියේ හිටි ෆය(ර්)ස්ටෝන් ඉන්ධන ලබා දෙන සේවකයත් එක්ක කතාබහක නිරත උනා. ඒ අතර ඔහු තමා කවුද කියල සේවකයාට හඳුන්වා දුන්න. “එතකොට අර කවුද?” ඔහු රථයේ පිටුපස සිටි එක් අයෙක් පෙන්වමින් ඇහුව. ෆය(ර්)ස්ටෝන් ඒ හෙන්රි ෆෝ(ර්)ඩ් බව සේවකයාට කිව්වා.

යම් නොරිස්සුමකින් සේවකයා රථයේ සිටි අනෙක් පුද්ගලයා කවුද කියාත් ඇහුව. ඒ තෝමස් අල්වා එඩිසන් බව ෆය(ර්)ස්ටෝන් කියා හිටිය. රථයේ ඉදිරිපස සිටි අනෙක් පුද්ගලයාට ඇඟිල්ල දිගු කරමින් සේවකයා “එතකොට මේ නත්තල් සීයා ද” කියා ඇහුව. එහි සිට ඇත්තේ ස්වභාව විද්‍යාඥ ජෝන් බරෝය. සුදු දිග රැවුල නිසා ඔහු මිතුරන් අතර ප්‍රකටව සිටියේ ද නත්තල් සීයා ලෙසයි.

 

හෝ චි මිංගේ අළු

හෝ චි මිංග් සැලකෙන්නේ වියට්නාමයේ නිර්මාතෘවරයා විදිහටයි. මියගිය පසු තමන්ගේ අළු බඳුනක බහා උස් කඳු මුදුන් තුනක භූමදානය කළ යුතු යයි ඔහු කියා තිබේ. “මේ වගේ ආදාහනයක් සනීපාරක්ෂාව පැත්තෙන් විතරක් නෙවෙයි වගා බිම් වලටත් හොඳයි” කියා හෝ චි මිංග් එය පැහැදිලි කර ඇත. (එහෙත් ඔහුගේ කැමැත්තට අනුව අවසන් කටයුතු සිදුව නැති අතර මොස්කව්හි ලෙනින්ගේ සොහොන අනුකරණය කරමින් හෝ චි මිංගේ මළ සිරුරද ස්මාරකයක ඔහුගේ දේහය තන්පත් කර ඇත).

 

මාරි කියුරිගේ අවවාදය

මාධ්‍යවේදියෙකු මාරි කියුරි  සොයා පැමිණෙන විට ඇය බ්‍රිතාන්‍යයේ නිවාඩුවක් ගත කරමින් සිටියෙ. නිවසේ ඉදිරිපස, වෙනදා සිටින ඇඳුමෙන්ම සැරසී සිටි නිසා මාධ්‍යවේදියා සිතුවේ ඇයගේ සේවිකාව තමා මේ ඉන්නෙ කියල.

මාධ්‍යවේදියා - ඔබද ගෙදර බලා ගන්නෙ ?             මාරි කියුරි - ඔව්

මාධ්‍යවේදියා - ඔබේ ස්වාමි දියණිය ගෙදර ඉන්නවද ?       මාරි කියුරි - නැහැ

මාධ්‍යවේදියා - ඇය ඉක්මනට එයිද ?            මාරි කියුරි - නැහැ

එවිට මාධ්‍යවේදියා ඇයගෙන් තම ස්වාමි දියණිය ගැන යමක් කියන්න කියා ඉල්ලා සිටිය.

“කියුරි මැඩම් පත්තර වාර්තාකාරයින්ට ලබා දෙන එකම පණිවිඩය මේකයි. මිනිස්සු ගැන ඒ තරම් කුතුහලයක් ඇතිකර ගන්න එපා. ඒත් මිනිස්සු කියන දේවල් ගැන පරිස්සමින්!”

 

මොලේ චීස් වගේ

හොලිවුඩයේ ගිණිසිළුව.. මැර්ලින් මොන්රෝ ගැනද සඳහන් වන්නේ අසාමාන්‍ය ගති තිබූ තැනැත්තියක් ලෙසයි. Some like it hot (1959) චිත්‍රපටයේ ඇතැම් දර්ශන නැවත නැවත බොහෝ වාරයක් රූපගත කිරීමට සිදුව තිබේ. “කමක් නැහැ. ඔයා දුක් වෙන්න එපා” රූගත කිරීම් වලින් පසු අධ්‍යක්ෂ බිලී ඇය අස්වසන්නට කී විට “දුක් වෙන්න මොනවද?” යනුවෙන් මැර්ලින් අසා ඇත. ඒ වගේම ඇය රූපගත කිරීම් වලට පමා වී එන හැම වාරයකම කියා තිබෙන්නේ “සමාවෙන්න, මට ඔබගේ ස්ටුඩියෝ එක හොයා ගන්න බැරි උනා” යන එකම බොරුවයි. මේ හැසිරීම් නිසා අධ්‍යක්ෂ සමස්ත රූගත කිරීම් අවසානයේ මෙහෙම කියල තියෙනව. “මැරිලින්ගෙ මොළේ හරියට ස්විස් චීස් එකක් වගේ. සිදුරුවලින් පිරිලා..!”

 

සාර්ථක ගැහැණිය

ලැනා ටර්නර් ද ඇයගේ කාලයේ සිටි ප්‍රකට, සුරූපී නිරූපිකාවකි, නිළියකි. සත් වරක් විවාහ වී ඇති ඇය සාර්ථක ගැහැණිය හා විවාහය ගැන මෙහෙම කියා තියෙනව.

“සාර්ථක මිනිසෙක් කියන්නෙ තම බිරිඳට වියදම් කළ හැකි ප්‍රමාණයට වඩා උපයන පුද්ගලයායි. සාර්ථක ගැහැණියක් කියන්නෙ එහෙම පිරිමියෙක් හොයා ගන්න පුළුවන් කෙනයි”

 

වේගවත්ම අවුරුද්ද

ක්ලිෆ් රොබ(ර්)ට්සන් ද ඔහුගේ කාලයේ සිටි දක්ෂ හා ජනප්‍රිය හොලිවුඩ් නළුවෙක්. අධ්‍යක්ෂකවරයෙක් හා නිෂ්පාදකයෙක්. ඒ වාගේම එකල ධනවත්ම නළුවන්ගෙන් ඉහලින්ම සිටි කෙනෙක්. විනෝදාංශය විදිහට පැරණි ගුවන් යානා එක්රැස් කිරීම් කළ ක්ලිෆ්ව  PT 109 (1963) චිත්‍රපටයේ ප්‍රධාන චරිතයට එක් වූයේ ජෝන් එෆ්. කෙනඩිගේ ඇරයුමින් බව කියවෙනව. ඒම චිත්‍රපටයේ තේමාව වෙන්නෙත් කෙනඩිගේ හමුදා දිවියේ පැතිකඩ ගැනයි. ඔස්කා සම්මානය ලැබූ පසු ඔහු මෙහෙම කියා තියෙනව.

“නළුවෙකුගෙ ජීවිතේ වේගයෙන්ම ගෙවිල යන වසර තමයි ඔස්ක සම්මානය ලබා ගත් වසර. කොයි තරම් ඉක්මනට ගෙවිල යනවද කිව්වොත් ඊළඟ වසරෙදි සම්මානය ගත්ත කෙනාම අහන්න පුළුවන් ගිය අවුරුද්දෙ ඔස්කා සම්මානය ගත්තෙ කවුද කියල”.

 

මරන්නෙ කාවද

රුසියාව, ස්වීඩනය සමග යුධ වදිමින් සිටි කාලයේ රුසියානු අධිරාජිනී එළිසබෙත් මැතිනිය කොසාක් සෙබළ නායකයට පින්ලන්තයට යන අතරතුරේ රජ මැදුරට ද එන ලෙස දැන්නුව.

“ඔබතුමියගෙ පියරජු මං කීව අවවාදය පිළිගත්තා නම් අද මෙහෙම යුද්ධයක් වෙන්නෙ නැහැ” ඔහු කතාව අතරතුර ඇයට කිව්ව. “ඔබේ උපදෙස උනේ මොකක් ද” රාජිනිය ඇහුව. “හැම ශ්‍රේෂ්ඨ මිනිහෙක්ම මරන්න. සාමාන්‍ය මිනිසුන් රුසියාවට අරන් එන්න” ඔහු තම උපදෙස නැවත මතක් කළා. “ඒත් ඒක මහා සාහසික උපදේශයක් නෙ” අධිරාජිනිය කියා හිටිය.

“මටනම් ඒක එහෙම පේන්නෙ නැහැ. මොකද දැන් වෙන්නෙ ඕකේ අනෙක් පැත්ත” සෙබළ නායකයා කීව.

 

වෙනස

ඉන්දියාවේ බිහි වූ දාර්ශනික සුළු පිරිස අතුරෙන් කෙනෙක් ලෙස ස්වාමි විවේකානන්දව ද හඳුන්වන්න පුළුවන්. තම ජීවිතය දුප්පතුන් වෙනුවෙන් කැප කළ ඔහු අවුරුදු 39ක් වැනි තරුණ වයසේම ගිහි ජීවිතයෙන් ඈත්ව යෝගී ජීවිතයකට හුරු උනා. එහෙම වෙමින් තම මතය අන් අය වෙතද ගෙන ගිය විවේකානන්ද තම අදහස් ප්‍රකාශ කරමින් සිටියදී පිරිසේ එක් අයෙක් තමන් හෙලා දකින්න කටයුතු කරන බව දැක්ක. එතුමා සමග කතාබහක් ඇති වී “ස්වාමී ජී, වඳුරෙකුගෙයි, ශ්‍රමණයෙකුගෙයි අතර වෙනස මොනවගේ ද?” කියා ඔහු අසා සිටිය.

එවිට ස්වාමි විවේකානන්ද මෙහෙම කිව්ව. “ඇත්තෙන්ම ඉතාම සුළු වෙනසයි තියෙන්නෙ. මේ වෙලාවේ ඉන්නෙ එකම මේසෙ දෙපැත්තෙ”

 

වික්ට(ර්) හියුගෝගේ ලියුම

ලේ මිසරාබලලේ (Les misarables) කෘතිය රචනා කළේ ප්‍රංශ නවකතාකරුවෙකු වන වික්ට(ර්) හියුගෝ. සිංහල අනුවාදනය ‘මනුතාපය’ නමින් ප්‍රකාශ කරේ ඇමතිවරයෙකුද වූ ඊරියගොල්ල මහතා. හියුගෝ සාමාන්‍යය ලේඛකයන් මෙන් නොව සිටගෙන තම ලිවීම කළ බව සඳහන් වෙන්නෙ. ඔහු ‘ලේ මිසරාබලලේ’ ලියා ප්‍රකාශන සමාගමට භාර දී ටික කලකින් එහි විකුණුම් තත්ත්වය දැන ගැනීමට ලිපියක් යවා තියෙනව. එහි සඳහන්ව තිබුණේ “?” ප්‍රශ්නාර්ථ ලකුණ පමණයි. ප්‍රකාශකයා හියුගෝට පිළිතුරු ලිපියේ යවා තියෙන්නෙ “!” විස්මයාර්ථ ලකුණ සටහන් කරමින්. ඒ නොසිතූ ලෙස විකුණුමක් පෙන්වන බව අදහස් කරගෙන.

මේ ලිපි දෙක ලොව මෙතෙක් ලියැවුන කෙටිම ලිපි දෙක ලෙස ගිනස් පොතටද ඇතුළත් ව තියෙනව.

 

වයස හොරකම් කරන්න බැහැ

වරක් හංගේරියානු යුද්ධයේ සිටි කර්නල්වරයෙක් සමග නැපෝලියන් කතාබහක යෙදුනා. ඔහු තමා මරිය තෙරේසා හමුදාවේ සේවය කළ බව කියා හිටිය. එවිට නැපෝලියන් “එහෙනම් ඔබේ ජීවිතේ බොහෝ කලක් එයට ගත කරන්න ඇති නේද” කියා ඇහුව. “ඔව්. අවුරුදු හැට හැත්තෑවක් විතර” කර්නල්වරයා පිළිතුරු දුන්නා. “මොනව.. ඔබ මුළු ජීවිත කාලේම ගණන් තියා ගෙන වෙගයි” නැපෝලියන් කුතුහලයෙන් කිව්ව.

“මේ බලන්න මහත්තයා.. මට තියෙන සල්ලි මං ගණන් කරනවා. තියෙන කමිස ගණන් කරනවා. ඉන්න අශ්වයෝ ගණන් කරනවා. ඒත් මම කවදාවත් ජීවිතේ අවුරුදු ගණන ගණන් කරන්නෙ නෑ. මොකද කාටද පුළුවන් ඒක හොරකම් කරන්න” කර්නල්වරයා කියා හිටිය.

ප්‍රංශ අධිරාජ්‍යයා වශයෙන් හැඳින්වෙන නැපෝලියන් බොනපාට් හැඳින්වෙන්නේ විශිෂ්ටතම යුධ සෙනවියෙකු. ඔහුගේ යුද උපක්‍රම අදටත් මිලිටරි පාසල් වල උගන්වන අතර ඔහුගේ නීති සංග්‍රහය, ලිබරල් ප්‍රතිසංස්කරණ ආදිය ගැනද දාර්ශනික පැතිකඩකින් විමසා බලයි. මේ ඔහුගේ ප්‍රකට කියමන් කීපයක්...

• බැහැ යන්න මෝඩයන්ගේ ශබ්ධ මාලාවේ පමණක් සොයා ගත හැකි වචනයකි.

• ඔබ නිතරම එක් සතුරෙක් සමග සටන් නොකළ යුතුයි. එමගින් සිදුවනුයේ ඔබ ඔහුට ඔබගේ යුද උපක්‍රම සියල්ලම ඉගැන්වීමයි.

• සිහසුන යනු වෙල්වට් වලින් ආවරණය කළ බැංකුවකි.

• ඔබට ලොව සාර්ථක පුද්ගලයෙකු වීමට අවශ්‍ය නම් දස වසරකට වරක් ඔබේ උපක්‍රම වෙනස් කරන්න.

• මා විටෙක සිවලෙකි. විටෙක සිංහයෙකි. ආණ්ඩුව පවත්වාගෙන යාමේ ප්‍රමුඛතම රහස නම් ඒ අවශ්‍ය වෙලාවේ අවශ්‍ය පුද්ගලයා වීමයි.

 

ඇරිස්ටෝටල්ගේ කියමන්...

• නීතිය යනු පීඩාවෙන් නිදහස් වීමයි.

• අපි සාමය අපේක්ෂා කරමින් යුද්ධය ඇති කරන්නෝ වෙමු.

• මිනිසා ඔහුගේ උසස්ම තත්ත්වයේදී අන් සියලු ම දෙනාට වඩා උතුම් වුවද නීතියෙන් හා යුක්තියෙන් වෙන් කල විට වඩාත්ම නරකම හා දරුණුම සත්වයා වනුයේ ද මනුෂ්‍යයා ය.

• යමෙකු යහපත් පාලකයෙකු වීමට නම් ඔහු තවකෙකු යටතේ පාලනය විය යුතුය.

• දේශපාලකයන්ට ද නිදහසක් නැත, ඔවුහූ ද දේශපාලනයෙන් තොර යමක් ඉලක්ක කරගෙන සිටිති. බලය, කීර්තිය, හෝ සතුට ඒ අතර වෙයි.

• ප්‍රජාතන්ත්‍රවාදයේ දී දුප්පතාට වඩා පොහොසතා වඩා බලවත් මක්නිසාද යත් බහුතරය දුප්පත් වන නිසාය.

මිනිසා ස්වභාව ධර්මයෙන්ම දේශපාලන සත්වයෙකි.

 

මා(ර්)ටින් ලූතර්ගේ කියමන්...

• සතුරෙකු මිනිසෙකු කළ හැකි එකම බලවේගය ආදරයයි.

• සහෝදරයන් සේ එකට ජීවත් වීමට අප ඉගෙන ගත යුතුය. එසේ නැතිනම් මෝඩයන් සේ වැනසී යා යුතුය.

• කිසි දිනෙක අමතක කරන්න එපා හිට්ලර් ජර්මනියේ දී කළ සියල්ල නීත්‍යනුකූල බව.

• සෑම විටම.. සම්පූර්ණයෙන්ම වාගේ, ලෝකය ලස්සන කළෝ නිර්මාණශීලී කැපවීම් කළ සුළුතරයෝ ය.

• සැබෑ නායකයෙකු යනු පොදු එකඟත්වයක් සොයන්නෙකු නොව පොදු එකඟතාව නිර්මාණය කරන්නෙකි.

• අප විවිධ නැව් වලින් පැමිණියෙමු. එහෙත් දැන් අප සිටින්නේ එකම බෝට්ටුවකය.

• අවසානයේ දී අපේ මතකයේ ඉතිරි වන්නේ සතුරන්ගේ වචන නොව මිතුරන්ගේ නිශ්ශබ්දතාවයයි.

 

අවසන් වදන්

එඩ්ගා(ර්) ඇලන් පෝ

ලොව පුරා ජනප්‍රිය සාහිත්‍යධරයෙක් වන ඔහු කුඩා කළ සිට අනේක දුක් කරදර විඳි අයෙක්. කුඩා කළ ම මව මිය ගොස් ඇති අතර පසුව පියාද ඔහුව අතැර ගොස් තිබේ. ඇලන් යන නාමය ඇත්තෙක් ඔහුව හදාවඩා ගත් නිසා ඒ නාමයත් තම නමට එක් කරගෙන තිබේ. ප්‍රබන්ධ, කාව්‍ය, කෙටි කතා ආදියෙන් සාහිත්‍යයට සේවය කළ එඩ්ගා(ර්) ඇලන් පෝ ගේ අවසන් වදන ලෙස සැලකෙන්නේ...

“Lord help my poor soul” (දෙවියනි මගේ අසරණ ආත්මයට පිහිට වේවා).

 

ඩයනා ස්පෙන්සර්

වේල්සයේ කුමරිය ලෙසින් හඳුන්වන ඈ ලොවම දන්නෙ ඩයනා යන නමිනි. චාල්ස් කුමරු හා ඇතිකරගෙන තිබූ රාජකීය විවාහය නවතා ඈ තනිකඩ දිවියක් ගත කළ අතර ඩොඩී අල්ෆයිඩ් නම් පෙම්වතා සමග යමින් සිටි සුපිරි වාහනය ලක් වූ අනතුරින් දෙදෙනාම මිය ගියහ. සමාජ සේවිකාවක් ලෙසත්, මානව හිතවාදිනියක් ලෙසත් නම් දරා හිටි ඩයනාගේ අවසන් වදන ලෙස සැලකෙන්නේ...

“My god.. What’s happen?” (දෙවියනේ මොකක්ද වුණේ?)

 

විලියම් ශේක්ෂ්පියර්

ඉංග්‍රීසි සාහිත්‍යයේ නියමුවා විදිහට හඳුන්වන ශේක්ෂ්පියර් කවියා, මහා නාට්‍ය 38ක්, සොනෙටා 154ක් ඇතුළු විශාල නිර්මාණ ප්‍රමාණයක් කළ බව කියවේ. ශේක්ෂ්පියර් 18 දී පමණ විවාහ වී ඇති අතර පෞද්ගලික තොරතුරු වැඩිය ලෝකයට විවෘත වී නැති තරම්ය. ඒ වාගේම ඔහුගේ යයි සඳහන් නිර්මාණ ඔහුගේම දැයි පවා මතභේද තිබේ. නමුත් ඔහුව වන්දනාමාන කළ අය ඒ යුගයේ සිටි බව කියවේ. අද ඔහුගේ නිර්මාණ දාර්ශනික අර්ථයකින් ලෝකයා විමසන අතර මහා නාට්‍යවේදියා ලෙසඳ හඳුනා ගැනේ. ඒ ඔතෙලෝ, මක්බෙත්, හැම්ලට් ආදී නිර්මාණ අදටත් විවිධ රටරටවල් වල වේදිකාගත කරමිනි. ශේක්ෂ්පියර් අවසන් වදන ලෙස සැලකෙන්නේ...

“සියල්ලන්ටම ආදරය කරන්න. කිහිප දෙනෙක් පමණක් විශ්වාස කරන්න”

 

බීතෝවන්

ලුඩ්විග් වෑන් බීතෝවන් ජර්මන් ජාතික මහා සංගීතවේදියා. ඔහුගේ සංගීත හැකියාව මුළු ලොව පුරාම ප්‍රසිද්ධ වුණත් ජීවිත කතාව ඒ තරම් ප්‍රසිද්ධ නැත. බීතෝවන්ගේ හැකියාව මෙන්ම ගතිගුණද අසාමාන්‍ය බව ජීවිත කතාව අධ්‍යනයේ දී පෙනී යයි. දොර ජනේල වසා දමා තිබූ විට හරින්නටත්, හැර දමා තිබූ විට ඒවා වසන්නටත් ඔහු ගෝරනාඩු කළ බව පැවසේ. ඒ වගේම අධික මත්පැන් පානයටත් හුරු ව සිටි අතර ඒ නිසා හටගත් අක්මා රෝගයෙන් මරණය තවතවත් ළඟ කරගත් කෙනෙකි. රෝගය උත්සන්නව හා කන් ඇසීම නැති වූ කාලයේ ද සංගීත කටයුතු එකසේ කරගෙන ගිය බවත් 1827 වසරේ දී මිය ගිය බව සඳහන් වේ. බීතෝවන්ගේ අවසන් වදන් කීපයක් හමුවේ. (හරි එක කුමක්දැයි ස්ථීර නැත)

• It's a shame, a shame — too late!" ("Schade, schade, zu spät!" in German). ("එය ලැජ්ජාවකි, ලැජ්ජාවකි - ප්‍රමාද වැඩියි!")

• මට දිවය ලෝකෙදි ඇහේවි...

• මම ස්වර කීපයකට වඩා ලියා නැහැ වගේ හිතෙනවා. මා කළ දෙයක් නැති හැඩයි...

 

මෝසා(ර්)ට්

සම්භාව්‍ය සංගීතයේ ප්‍රබලෙක් වන මෝසා(ර්)ට් පියානෝ, ඔපෙරා, ප්‍රසාංගික නිර්මාණ ආදී 600 කට අධික නිර්මාණ ප්‍රමාණයක් කළ බව වාර්තා වේ. බීතෝවන්ගේ මුල් නිර්මාණවලට ආභාෂයක් මෝසා(ර්)ට්ගෙන් ලැබුණු බවද කියවේ. කෙටි ජීවිතයක් ගත කළ මෝසා(ර්)ට් තරුණ අවදියේම (අවුරුදු 35) මරණයට පත්ව ඇත.

“The taste of death is upon my lips.. I feel something that is not of this earth” (මරණයේ මිහිර දැන් මගේ දෙතොල් මත.. මෙලොවෙන් පරිබාහිර යමක් මට දැනෙනවා)

 

බ(ර්)නාඩ් ෂෝ

ප්‍රශස්ත නාට්‍යකරුවන් අතුරින් කෙනකේ ලෙස ප්‍රචලිත මොහු සංගීතයට, සාහිත්‍යයට ද දස්කම් දක්වා තිබේ. ඒ වාගේම ලන්ඩන් ආර්ථික විශ්ව විද්‍යාලය බිහි කිරීමේ පුරෝගාමියෙක් ද වේ. 1925 දී බ(ර්)නාඩ් ෂෝ සාහිත්‍ය සඳහා වූ නොබෙල් ත්‍යාගය ලබා ගන්නට පවා වාසනාවන්ත විය. ඔහු මිය ගොස් ඇත්තේ ගෙවත්තේ සිටිය දීයි.

“I want to sleep..” (මට නිදා ගැනීමට අවශ්‍යයි..)

Read More

 

මේ සාහිත්‍යය මාසය නිසාත් විවිධ පොත් ප්‍රදර්ශන, සම්මන්ත්‍රණ ආදිය පැවැත්වෙන නිසාත් ඒ සම්බන්ධව අල්ලලා ලියා තිබූ ලිපියක් post එක විදිහට දාන්න හිතුව.

මේ පුද්ගල සංවර්ධන දේශක කැලුම් වැලිගම මහතා විසින් පුවත්පතක පල කළ ලිපියකි

 * * * * *

අපේ ජීවිතය පුදුමාකාර විස්මයක්. ඊළඟ මොහොතේ කුමක් වෙයිද කියල අපි කාටවත් හිතා ගන්න බැහැ. එහෙත් ජීවිතයේ සෑම ඊළඟ මොහොතක්ම විස්මිත මොහොතක් බව මතක තියා ගන්න. එසේම එය විශ්වාස කරන්න. ඔබ එහෙම විශ්වාස කළොත් පමණයි සෑම අසීරු තත්ත්වයක් තුළම වාසනාවන්ත අවස්ථාවක් සැඟවිලා තියෙන්නෙ. මේක බ්‍රසීලයේ සිදුවුණ අපූරු දෙයක්. බ්‍රසීලයේ බන්ධනාගාරයක සිද්ධ වුණ ඇත්ත කතාවක්. බන්ධනාගාරවල සිරකරුවන් වැඩියෙන් සිටීම අදටත් අපේ රටෙත් තියෙන ගැටළුවක්. මේ ගැටළුව විසදන්න බ්‍රසීල රජය ගත්ත ක්‍රියාමාර්ග නිසා සිරකරුවන්ගේ ජීවිත සැබවින්ම වෙනස් වුණා. අපි මුලින්ම ඒම කතාව වෙතට අවධානය යොමු කරමු.

සැබවින්ම සිරකරුවන් එක් කුටියක වැඩි වීම නිසා ඔවුන් වැඩිපුර දේවල් කතා කරන්න පටන් ගත්තා. මෙම කතා බොහොමයක් නතර වෙන්නෙ අන්තිමේට ලොකු ගැටුමකින්. බොහෝ වෙලාවට එක්කෙනෙක් දෙන්නෙක් අනිත් කෙනාගේ අතක් පයක් කැඩෙන්න ගහනවා. දිගින් දිගටම වර්ධනය වෙන මෙම ගැටළුව නිසා බන්ධනාගාර පරිපාලනය සිරකරුවන් පැත්තකට කරලා නිශ්ශබ්දව තියන්න පුළුවන් ක්‍රමයක් ගැන හිතන්න පටන් ගත්තා. ඊට විසඳුම ලෙස සිරකරුවන් පොත් කියවන්න යොමු කිරීම, මේ ප්‍රශ්න විසඳන්න තියෙන හොඳම විසඳුම බව ඔවුන් වටහා ගත්තා. එහෙත් බොහෝ දෙනෙක් පොත් කියවන්න අකමැතියි. අදටත් රූපවාහිනිය නැරඹීමට වඩා පොත් කියවීම තුළ කෙනෙකුගේ සිත සහ කය කියන දෙකටම වාසිසහගත දේවල් සිද්ධ වුණත්, රූප පෙට්ටිය අමතක කරලා ඔලුවට මෝල බද්ධ කරන පොත්වල සුවඳ හමන පිටු අතරේ සැරිසරන්න බොහෝ දෙනෙක් අකමැතියි. නමුත් රූපවාහිනියේ සහ අන්තර්ජාලයේ ම එල්ලිලා ඉන්නවාට වඩා පොත් කියවීම ඉතා හොඳ පුරුද්දක් බව පොත් නොකියවන අය පවා පිළිගන්නවා. කෙසේ වෙතත් දරුණු සිරකරුවන් තුළ පොත් කියවීමේ පුරුද්ද ඇති කරලා ඔවුන් සන්සුන් කිරීම හිතන තරම් ලෙහෙසි දෙයක් නෙවෙයි.

ජීවිතය ක්‍රියාත්මක වෙන්නෙ අපේ පුරුදු මතයි. එම නිසා පොත් කියවීම සිරකරුවන් අතර පුරුද්දක් බවට පත් කරන්න නම් ඔවුන්ට ප්‍රතිලාභයක් ලබා දිය යුතුයි යන  තීරණයේ පරිපාලනය හිටියා. කිසියම් සිරකරුවෙක් පොතක් කියවා අවසාන කළොත් ඔහුගේ සිර දඬුවමින් දින හතරක් නිදහසක් ලැබෙනවා. මෙම වැඩසටහන ඔවුන් නම් කළේ “කියවීම තුලින් නිදහස් වීම” (Redemption through reading) වශයෙන්. එහෙත් සිරකරුවන්ට වසරකට කියවන්න ඉඩ දුන්නේ පොත් දොළහක් පමණයි. එසේම එක් පොතක් කියවා අවසානයේ එම පොත පිළිබඳව කෙටි අදහසක් සිරකරුවා ලියා භාරදිය යුතුයි. වසරකට පොත් දොළහක උපරිමයක් නිසා හිතු මනාපයට පොත් ගොඩක් කියවලා දින නිදහස් කරගන්න සිරකරුවාට බැහැ. කෙසේ වෙතත් පොත් දොළහක් වරසක් තුළ කියවූ සිරකරුවෙක්ට සති 6ක් තමාගේ සිර දඬුවමින් නිදහස් වෙනවා. කටුක සිපිරිගෙදර දිවියෙන් විනාඩියකට කලින් හෝ ඉවත් වෙනවා කියන එකම ලොකු සහනයක් නිසා සිරකරුවාට මෙහි කිසියම් වාසියක් තියෙනවා. සිරකරුවන්ට අවශ්‍ය පොත් නිර්දේශ කළේ කියවීම ගැන අවබෝධයක් තියෙන කමිටුවකින්. සාහිත්‍ය, දර්ශනය සහ විද්‍යාව වැනි විෂයන්ට අදාළ හොඳ පොත් ගොඩක් තිබුණා. මොනවා හරි පොත් ගොඩකින් බන්ධනාගාර පුස්තකාලය පිරවීම ඔවුන්ගේ අරමුණ වුනේ නැහැ. සැබවින්ම බ්‍රසීලයේ දරුණුම සිරගෙදරක් තුළ ඉතා නිහඬව සිද්ධ වුන මෙම කටයුත්ත නිසා කාලයක් යද්දී එම සිරගෙදර ගැටුම් අඩු වුණා. මන්දයත් බොහෝ සිරකරුවන් නිදහසේ පොත් කියවන්න පටන් ගත්තා. සමහරු තවත් සිරකරුවන් සමග පොත් ගැන කතා කරන්න පටන් ගත්තා. ඉතා හොඳ පරිසරයක් බිහි උනා.

අරවින් ජේම්ස් (Erwin James) කියන්නෙත් මේ සිරගෙදර හිටිය සිරකරුවෙක්. ඔහු මිනීමැරුම් චෝදනාවකට වරදකරුවෙක්. වසර 20කත හිරේ ගිය දරුණු මිනිසෙක්. කෙසේ වෙතත් හිරගෙදර ඉන්න කාලේ පොත් කියවීමේ ක්‍රියාවලිය ඔස්සේ ඔහුගේ සිරදඬුවමින් සැලකිය යුතු කාලයකට කලින් සිරගෙදරින් පිටවෙන්න ඔහුට හැකියාව ලැබුණා. එහෙත් අරවින් ජේම්ස්ගේ ජීවිතය සිරගෙදරින් එළියට ආවට පස්සේ නැවතුණේ හිතාගන්නත් බැරි තැනකින්. වසර 20කත පසුව ඔහුට ‘ද ගාර්ඩියන්’ පුවත්පතට ලියන්න අවස්ථාවක් ලැබෙනවා. ඔහු සිරගෙදර සිට කියවපු පොත් ඔස්සේ ඔහුට ලියන්න කියන්න නිර්මාණාත්මක අදහස් ගලාගෙන ආවා. ද ගාර්ඩියන් පුවත්පතට ඔහු ලියපු දේවල් ජනප්‍රිය වුණා. අවසානයේ ඔහු නිව්යෝර්ක් ටයිම්ස් ලැයිස්තුවට ඇතුළත් වුණ වැඩිම අලෙවියක් සහිත කෘති දෙකක් රචනා කළ ලේඛකයෙක් ද වුණා. අරවින්ගේ ජීවිතය මේ තරම් වෙනස් වුණේ සිපිරිගෙදරදී ඔහු කියවූ පොත් නිසා බව ඔහු අද කියනවා. ගෙදරට දවසකට කලින් හෝ යන්න අවශ්‍ය නිසා පොත් කියවන්න පටන් ගත්ත ඔහු පසුව පොත් ඉතා ආශාවෙන් කියවන්න වුණා. “මම සිරගෙදර ඉඳිද්දී කියවපු පොත් මාව කලින් සිරෙන් නිදහස් කළා පමණක් නෙවෙයි, මගේ සිරවුණ සිතත් නිදහස් කළා” ඔහු පවසනවා. පොත් නොකියවපු අර්වින් පොත් කියවන්න පටන් ගත්ත නිසා ඔහුට ජීවිතය දෙස වඩා විවෘතව සහ උපේක්ෂාවෙන් බලන්න හැකියාව ලැබුණා. අපි ඒ ඉදිරිපත් කළේ ඒම සිරගෙදර හිටිය එක් සිරකරුවෙක්ගේ කතාවක් පමණයි. පොත් කියවීම ඔස්සේ තවත් බොහෝ සිරකරුවන් ජීවිතය වෙනස් කර ගත්ත අතුරු කතා ගොඩක් ඇති.

“කියවීම මිනිසා සම්පූර්ණ කරයි” කියලා ඔබ දන්නවා. එහෙත් කියවීමේ පුරුද්ද පවතින්නේ ඉතාම සුළු ප්‍රමාණයකට පමණයි. එහෙත් තාක්ෂණය කෙතරම් දියුණු වුණත් තවමත් යුරෝපීය ජාතිකයින් පොත විසිකරලා ජංගම දුරකථනය අතට අරගෙන නැහැ. විශේෂයෙන් පොත් කියවීමේ පුරුද්ද ක්‍රමානුකූලව දරුවන් තුළ රෝපණය කළ යුතු පුරුද්දක් නිසා මේ සම්බන්ධව මව්පියන්ට කළ හැකි දේ බොහොමයි. ඔහේ දරුවාට මොකක් හරි පොතක් කියවන්න දෙනවා වෙනුවට දරුවා කියවීමේ රසයට හුරු කරන කෘති සොයා දීම මව්පියන්ගේ වගකීමක්. මා පහුගිය කාලයේදී ලංකාවේ විවිධ ප්‍රදේශ රැසකට ගියා. එය කෙටියෙන්ම යාපනයේ සිට වැලිගම දක්වා. ලංකාවේ බොහෝ නගරවල පොත් අලෙවිසැල් (bookshop) දකින්න පුළුවන් වුණා. එහෙත් මේ බොහෝ සාප්පුවල දකින්න තිබුණේ අභ්‍යාස පොත් සහ පත්තර මිසක නවකතා හෝ කෙටිකතා හෝ පර්යේෂණ කෘතීන් නොවෙයි. දරුවන් අභ්‍යාස පොත් කියවීම වෙතම කුඩා කල සිටම හුරු කරන නිසා පාසල් අධ්‍යාපනයෙන් පසුව පොත් කියවන්න බොහෝ දෙනා හිතන්නේ නැහැ. බ්‍රසීලයේ දරුණු සිරගෙදරක ක්‍රියාත්මක වුණ ඉහත සඳහන් කළ පොත් කියවීමේ වැඩසටහන වැනි දේවල් ලංකාව තුළ ක්‍රියාත්මක කරන්න උත්සහ දරනවා නම් එය ඉතා වටිනවා. විශේෂයෙන්ම අනෙක් අයටද පරිහරණය කළ හැකි කුඩා පුස්තකාල පවත්වාගෙන යන පිරිස් මට හමුවෙලා තියෙනවා. ඔබත් දන්න හඳුනන කෙනෙක් එහෙම හොඳ දෙයක් කරනවා නම්, අප වෙනුවෙන් ඔහුව හෝ ඇයව තවත් ධෛර්යවත් කරන්න.

ඔබට ඇස් අරගෙන සිහින දකින්නෙක් වෙන්න අවශ්‍යනම්, ඔබ පැහැදිලිවම පොත් කියවීමේ පුරුද්ද ජීවිතය තුළ ආරෝපණය කරගත යුතුයි.

ලෝකයේ තවමත් අවම පිරිවැයකින් වැඩිම දැනුමක් ලබාගත හැකි මාධ්‍ය වන්නේ ද පොත් කියවීමයි. ඒම නිසා එය සාහිත්‍ය මාසයට පමණක් සීමා නොකර සෑම මාසයකටම අනුගත කරගන්න.

“2015 වර්ෂයේදී මගේ අභියෝගය වන්නේ සෑම සති දෙකකට වරක්ම අලුත් පොතක් කියවීමයි. විවිධ සංස්කෘතීන්, විවිධ විශ්වාස, විවිධ මිනිස් හැසිරීම් සහ තාක්ෂණයට අදාළ පොත් කියවන්න මම බලාපොරොත්තු වෙනවා. වසර ආරම්භයේ දී විවිධ ෆේස්බුක් එකමුතු (Group & communities) රැසක් මට අභියෝග රැසක් එවලා තිබුණා. ඔවුන් සියලු දෙනාටම ගොඩක් ස්තූතියි. එහෙත් මම 2015 දී පොත් කියවීමේ අභියෝගය භාර ගත්තා. මම හිතනවා පොත් කියවීම ඔස්සේ ඕනෑම කෙනෙක් තුළ ඇතුළත බුද්ධියක් නිර්මාණය වෙනවා. අද ගොඩක් මාධ්‍යයෙන් මතුපිටින් ඔබට පෙන්වන දේවලට වඩා බොහෝ දේ ඔබට ලබා දෙන්න හොඳ පොත් සමත් වෙනවා. ඒක නිසා මම මේ වසර පොත් කියවන්න වෙන් කරනවා. මම කියවන පොත් පිළිබඳ තොරතුරු year of Books නම් පිටුවට යොමු කරනවා. ඔබට එයින් අදහසක් ගන්න පුළුවන්. ඔබ ඇත්තටම පොත් කියවන්න කැමති නම් විතරක් ඒම පිටුවට කැමැත්ත ප්‍රකාශ කරන්න”. ඒ 2015 ජනවාරි මස 02 දින මාර්ක් සකබර්ග් ඔහුගේ ෆේස්බුක් පිටුවේ යොදා තිබුණ සටහනයි. ඔහු 2015 වසර ආරම්භ කරේ සෑම සති දෙකකට වරක්ම පොතක් කියවීමේ අභියෝගය සමගින්. ෆොර්බ්ස් 2014 වර්ගීකරණයට අනුව මාර්ක් සකබර්ග් ලොව බලවත්ම මිනිසුන්ගේ ලැයිස්තුවේ 22 වැනි තැන ඉන්නවා. එසේම ලොව ලාබාලතම බලවතුන් අතර ඔහු පළමු වැනියා. එපමණක් නොව ලොව ධනවතුන්ගේ ලැයිස්තුවේ ඔහු පසුවන්නේ 16 වැනි ස්ථානයේ. වයස අවුරුදු 30 වෙන්නත් කලින් ලොව බලවත් මෙන්ම ධනවත් පුද්ගලයෙක් වුණ මාර්ක් සකබර්ග්ට තවත් පොත් කියවලා රැස්කරගන්න තියෙන දැනුම මොකක් ද? සෑම සති දෙකකට වරක්ම මොකක් හරි පාටියකට සෙට් වෙන්නේ නැතිව ඔහු පොත් කියවන්න හේතුව මොකක් ද? සැබෑ අධ්‍යාපනය යනු එයයි. එහෙනම් අපි ඇස් ඇරගෙන සිහින දකිමු.

Read More

අදත් වැස්ස... මේ දවස් ටිකේ ඉතීම් වැස්ස තමයි. ඊයේ හවස යාලුවෙක්ගෙ studio එකකට පොඩ්ඩක් ගෙහුං එන්ට ගියා. ගිහින් ඉන්නකොට ඌ අහපි... ඉස්සරහට ඉතින් මොකෝ වෙන්නෙ කියල.

මං රනිල් රාජපස්සද, නැත්තං ජ්‍යෝතිෂ්‍යකාරයෙක්ද... රටේ ඉස්සරාට වෙන විගඩන්, නාඩගං ටික කලින් දැනගන්න. හුම්. වැහි කළුවක් ආව. කාලගුණය මේ තියෙනවා... මේ වෙනස් වෙනව. හරියට මොකක් වෙයිද කියල හිතා ගන්න බෑ.

මං... ඌයි තා එකෙක් එක්කයි දන්හිල් එකකුත් ගහල කාරිය එන්ට ආව. අද රෑ කඩේ යද්දිත් පොඩි වැහි mood එකක් තිව්න. දවස් පඩි කාරයො... බාර් එක ගාව. බියර් ගන්නවා, වඩේ කනවා... මත් වෙච්ච අස්සෙ ඉතුරු සල්ලි හරිදත් බලනවා. පව් ඉතීම් අසරණ ජීවිත. මං නම් බොන්නෙ නෑ........ බියර්. ගෑස්ටික් එක නිසා බියර් ටිකක් අමාරුයි. අනිත් ඒවා... හි..හ්හි. සිගරට් උනත් ඇඟට හොඳ නෑ නෙ. ඒ නිසා මං මේ ටිකේ දන්හිල්. තව පොඩ්ඩෙන් රු100ක ආසන්නයට වැටයූ දන්හිල් එක තෙමෙනවා. ඒත් ලොකු අවුලක් නෑ... මොකද තාම රු 8ට ගත්ත ගිණිපෙට්ටියක් නෙ තියෙන්නෙ. 40හේ ගිණිපෙට්ටියත් අවුලක් නෑ ඉතීම්... මොකද IMF ණය හම්බවෙන සීන් එකක් තියෙන්නෙ.

පොද වැස්සෙ යනකොට, අඳුරන වැඩිහිටියෙක් කියාපි... කුඩයක් අරං යන්න. වැඩේ කියන්නෙ උන්ද කුඩයක් ගෙනල්ලත් නෑ. මේ පොඩි දුරට මොන කුඩද.. ඕව උස්සන් යන්න බෑ.... මං කියල දැම්ම.

ඊයෙ හවස ලොකු වැඩක් නැති හන්ද blog පැත්තට ගියා. නිදිගෙ පංචතන්තරේ නිදියි, ඩ්‍රැකීගෙ අඩවියේ ඩ්‍රැකීයි post දෙකක් දාල... ෆිලුමක් ගැන. ඒවත් කියවන්න එපෑ ඉතීම්.

නිදියත්... ලියන්න ඕනෙනම් ලියපං තනියෙම. තව කවුරුවත් මොකටද. අනික ඩ්‍රැකීය ෆිලුම් ගැන ලියන එක අඩුකරලත් තිවනෙ....... මේක දිගටම යයිද. ඒම උනොත් මට තමා කෙල වෙන්නෙ. මගේ ෆිලුම් post ලෙප්ට්. කෝකටත් හොඳ මූණ දාගෙන ගෙහුං කමෙන්ට් කරා... නැත්තං වැඩේ මාට්ටු නෙව. මොක උනත් මයෙ blog බලන්න එන ඈයො ඉන්නෙත් කීයෙන් කී දෙනාද. එයිනුත් මිනිස් පරාණ ඊට අඩුයි. වැම්පයර් කියයි, බස්සො කියයි. ඇයි නයි. Pra Jay... ඒ යෝදය, තල තිස් එකෙන් මොකට අයිති වෙනවද කියල දෙයියො තමයි දන්නෙ. ලඟදි bra එකකුත්... බලන වගක් නම් දැනුණ හිට.

ඔන්න ඉතීම් මොක උනත් Thirteen Lives (2022) ෆිලුම බාගෙන බැලුව. මුන් නම් කියයි. මං එපෑ ඩේට කපන් බාගන්න. ඒ අස්සෙ මැසේජ් එනවා දිගට හරහට.... වෙන කාගෙන්ද, දුරකථන සේවා සපයන්නන්ගෙන්. පහසුකම් හා සේවා ගාස්තු වැඩි කරාය කියල හිට... රජයේ අණ පරිදි. අනෙ අම්මප. කම් නෑ. කම් නෑ... phone එකේ contact list එකේ පතුළ නොපෙනුනාට... සම්බන්ධතා තියන් ඉන්න කීයෙන් කී දෙනාද. උන් ටිකත් හලලා... net යන ඒකත් නවත්තලා... සිම් එකයි, රවුටරෙයි ජාතියේ නාමෙන් කුණු කූඩෙට දානවා. මොකද IMF ණය හම්බවෙන සීන් එකක්නෙ තියෙන්නෙ.

කඩේ ගෙහුං එනකොට කෙල්ලෙක් පාන් ගෙඩියක් සොපින් එකේ දාන්... උජාරුවට යන ලස්සන. හුම්ඃ... මං බලයි ඔය ලොකුකම්. අර ඌරුවරිගේ වන්නිල ඇත්තන්, නොදියුණු ජාතියක් ද තාම ?

Read More

නස්රුදීන්... නම ඇහුව නැති කෙනෙක් නැති තරම්. ඒ වගේමයි ඔහුගෙ ජීවිතය හා බැඳී කතාත්. සමහර ඒවා බොහොම විචිත්‍රවත්, තවත් ඒවා බොහොම දාර්ශනිකයි සහ සමහර කතා බොහොම විනෝද ජනකයි. නමුත් ඒ සෑම කතාවක් ම එක වාගේ මිහිරි.

ඉතිහාසය විමසා බලද්දී රටවල් කීපයකින්ම නස්රුදීන්ව හමුවෙනව වගේම, ඔහුව තම රටට අයිති කරගන්නත්... රට රටවල් උත්සහ දරල තියෙනව. කොහොම උනත් ඔහු හිටියා ය කියලා පොදු පිළිගැනීම තියෙන්නෙ තුර්කි රටේ. ජීවත් වූ කාලය ලෙස දැක්වෙන්නෙ 1208 – 1284 වගේ කාල පරාසයක්. පෙනෙන්නට තිබෙන හැටියට... රටින් රටට යාමේ දී ඒ රටවල පුද්ගලයන් හා ඔවුන්ගේ කතාද, නස්රුදීන් හා ඔහුගේ කතා වලට මිශ්‍ර වී ඇති හැඩයි. එයින් පසු සියලු කතා, පුද්ගල ස්වරූප නස්රුදීන් යන නාමයට වටා ගොනු වන්නට ඇති. ඊසොප්ගේ උපමා කතා ද, සෙන් දහමේ සෙන් කතාද... ඔහුගේ කතා අතරට එකතු වී ඇති බව පෙනී යාමෙන් මෙය වටහා ගන්න පුළුවන්.

කොහොමින් උනත් වඩා හොඳ මොකක්ද...  කාලයක් සිට මේ පැවත එන වටිනා කතා සමුදාය අපේ ජීවිත කතාවට එකතු කර ගන්නවා ද, නැතිනම් ඉතිහාසය කාල් ගගා ඇත්ත හොයමින් වෙහෙසෙනවා ද?

* * * * * * * *

 

 

බූරුවා පිටේ යෑම

බූරුවා සමග නගරයට යන නස්රුදීන්ගෙන් අශ්වයෙක් පිටේ නැග යන ධනවතෙකු අපහාසයට මෙන් ඇහුව ‘බූරුවෙක් පිටේ යන එක මොන වගේ ද?’ කියල.

‘අශ්වයෙක් පිටේ බූරුවෙක් යනවට වඩා නම් හොඳයි’ නස්රුදීන් ඔහුට උත්තර දුන්න.

 

දවස කවද්ද

නස්රුදීන් වෙළඳාමට වෙනත් ගමකට ගිහින් ඉන්න අතරවාරයේ එහි අයෙක් ඇවිත් ‘අද දවස කවද්ද?’ කියා ඇහුව. වෙළඳාම ගැන පමණක් අවධානයෙන් හිටි නස්රුදීන් ඔහුට මෙහෙම කිව්ව.

‘මං මෙහෙට ආගන්තුකයෙක්, මේ ගමේ කෙනෙක්ගෙන් අහල බලන්න’.

 

රහස

නස්රුදීන්ගේ මිත්‍රයෙක් දවසක් ඔහුගෙන් ඇහුව ‘දිගුකලක් කරදර වලින් තොරව ජීවත් වීමේ රහස මොකක්ද?’ කියල. මිත්‍රයා දෙසට හැරුණු නස්රුදීන් ඔහුට මෙහෙම කිව්ව.

‘පාද උණුසුම්ව තියාගෙන, හිස සිසිල්ව තබා ගන්න. ගැඹුරින් හිතන්න එපා. ඒවගේම සැහැල්ලුවෙන් ජීවත් වෙන්න’.

 

ආදරෙන් බැඳීම

ලස්සන කාන්තාවන් බොහෝ පිරිසක් සමග ආදරයෙන් බැඳුන පුද්ගලයෙක්, තමන්ට ඒ කිසිම කාන්තාවක් කැමති නොවන්නේ ඇයි දැයි නස්රුදීන් ගෙන් විමසුවා.

‘ඔබ අවලස්සන කාන්තාවක් සමග ආදරයෙන් බැඳුනොත් මොකද’ නස්රුදීන් අසා සිටිය.

 

හොඳ කොයි ගමද

දවසක් එක නගරයක සිට අනෙක් නගරයට යමින් සිටි නස්රුදීන් වෙත, එහා නගරයෙන් ආ පුද්ගලයෙක් මුණ ගැහුණ. ‘ඔයා දැන් ඉඳල එන නගරය, කොහොමද?’ ඔහු නස්රුදීන්ගෙන් ඇහුව. නස්රුදීන් එම ප්‍රශ්නය පෙරළා ඔහුගෙන්ම අසා සිටිය. ‘අපෝ ඒ නගරයද, කතා කරලා වැඩක් නැහැ. මිනිස්සු තිරිසන්නු වගේ. හැම තිස්සෙම රණ්ඩු. කිසිම හොඳක් නැහැ’.

‘ආ එහෙමද... මෙහෙත් එහෙම තමයි’ නස්රුදීන් පසුකර ආ නගරය ගැන විස්තර කරා. නැවතත් මදක් දුර යද්දී නස්රුදීන් හට තවත් පුද්ගලයෙක් මුණ ගැහුණ. ඔහුත් අර ප්‍රශ්නයම යොමු කරා. එවිට නස්රුදීන් පෙර සේ ප්‍රශ්නය පෙරළා ඔහුටම යොමු කළා. ‘එහෙ... කියන්න තරම් වරදක් නැහැ. මිනිස්සුත් හොඳයි. සතුටෙන් ඉන්නව’ ඒ ඔහුගේ උත්තරයයි. එය අසා සිටි නස්රුදීන් ඔහුට තම පිළිතුර කියා හිටිය.

‘ආ එහෙමද... මෙහෙත් එහෙම තමයි’.

 

තියෙන සේරෝම පොස්ටුවේ දාන්ට බැරි හන්ද pdf එකකට දැම්ම ගන්ට -

PDF එක (කතා 75ක් තියේ)

Read More