ආටා එක, වීල් එක, ත්‍රීවිලය, ටැක්සිය.... ඔය කියන නම් වලින් වරනගන වාහනය තමයි කවුරුත් දන්න ත්‍රී රෝද රථය. හප්පන් ගිය වාහනෙ ගැන අහපු පොලිස් උන්නැහේට, ආච්චි කෙනෙක් නම් කියල තියෙන්නෙ "මහත්තයෝ මාව රේඩියෝ එකක් හප්පං ගියා" කියලයි. ඒ උන්ද ඒ වාහනේ දැකපු තාලේ.

හන්දියක් හන්දියක් ගානේ තියෙන, ඕන පාරක් දන්න, මහ මග කරදරේකදි මුලින්ම එන කෙනා තමයි ත්‍රීවීල් මල්ලි.. නැත්තං අයිය. සමහර අයියල නම් ලෝකෙ කාල වතූ බීල ඉන්නෙ. එහෙං දැමිලි, මෙහං දැමිලි නිසා ගොඩ වෙලාවට අනතුරු, තදබදය වැඩි වෙන්න හේතුවක්ය කියල ආඬපාලි කියාගත්තු කස්ටියකුත් නැතුව නෙමේ... මේ අයට. කෝම උනත් එදිනෙදා ජීවිත වලට මේ අයගෙ උදව් නැතුව බෑ. ඒ අස්සෙ සමහර අයට මේ අයගෙන් උන ඇබැද්දිත් ඇති.... මටනම් ඉතීම් උදව් ලැබුන අවස්ථා හා අප්සට් seen වෙච්චි නැතිම තරම්. ඒ හින්ද මධ්‍යස්ථ මතයක මං ඉන්නෙ.. අඳුරන බුවාලත් මේ රස්සාව කරන එකේ වැරදි කියලත් බෑ නෙව. කොරියන් විභාගෙට පාඩම් කරන උන් ටිකකුත් හිටිය... කාලයක්.  සමහර උන් බැඳලා. Park එකේ ඉන්න ගමන් කොරියන් ඉගෙන ගන්නවා... පොත් බල බල. ඒ අතරෙ සුද්දන්ට හයර් යන්න  කතා කරනවා... come sir/miss. මීටර් හෑව්. යු වෙයා ගෝ....

          මට උන හොඳ වැඩ වලින් එකක් මේ -

ඒ කාලේ වැඩ කළ ඔපීසියේ වැඩකට කොහිදෝ ගොහින් ආපහු එනකොට පෝං එක ඒ ත්‍රීවීල් එකේ තියල ඇවිදින්. ඒ අස්සෙ හයර් එකේ ගාන දීල තිව්නෙත් අඩුවෙන් නිසා ඇඟේ මයිල් කෙලින් උනා... එකක් නෑර. හැබැයි උන්ද call කරපු ගමන් ගත්ත... අරං කීව, පෝං එක අහවල් කඩෙන් තියන්ටම් ගන්නෙයි කියල. එදා උන්ද ගිය පැත්ත බලං වැන්දෙ නැති ටික විතරයි ඉතීම්...

එක කාලයක් ආව කුෂන් සීට් අතුරාපු, ඇලුමිනියම් වැටවල් ලියවැල් වගේ වටේ දුවපු, තොරනකට නොවැඩි ගණනින් බලුප් වැල් ඇදපු, හයි පයි සමාන සවුන්ඩ් සිස්ටම් සතු වෙච්ච ත්‍රීවීල් යුගයක්. හරියට භවනක් වාගේ ඒවා. සමහර ඒවා නම් යකාගේ භවන සදිසි... මිනී ඔලුත් ගහල තිව්න. ඔය හැම වැඩකම යෙදුනේ ඉතින් තරුණ පිරිස තමා... උන්ගෙ කලාව එලියට ආපු විදිහ තමා ඉතින් ඒ. දැන්නං ඒ සුකුරුත්තං අඩුයි... ඒත් නැතුවාම නෙමේ. දැන් ඉතින් රත්තරං වටිනා තෙල් හොයාගන්නත් සෑහෙන කට්ටක් කන්න එපා.. ඒ වගේද spare parts වල ගණන්, service charge එහෙම.  ඒ නිසා වෙන්න ඇති කෙනෙක් මේම ගහල තිව්නෙ.

නන්දෙ ඔයා දීපු සැපට දවාලෙ තරු පෙනුනා...

  මේ කොරෝනා වලට ගහපු වදනක්... 

හදිස්සි ගමනක් යන්න, ගෙදර වයසක උන්දැව කොයි හරි එක්ක යන්න, ගෙදරට බඩුටික අරගන්න, බස් නැති දවසෙ/ වැහි දවසෙ ගෙදර යන්න, හොර ගමනක් යන්න... ඔය කියාපු නොකියාපු හැම ගමනටම ත්‍රීවීල් සහෝල ඕන වෙනව. අතරින් පතර සහෝදරියොත් ඉන්නව නෙව. ඒ විතරක් නම් මදෑ බොන තැනක ඝනපූර්ණය රකින්නත් උදව් වෙන වෙලාවල් තියෙනව... මේ සහෝල. ඒ අතර වලි, kidnap, මත්ද්‍රව්‍ය ප්‍රවාහනය ඇතුළු නානාවිධ දේවල වලට පවා සමහරක් අයගෙ සම්බන්ධය ඇදිල යනව.... ගෙවන සිල්ලර ජීවිතයත් එක්ක. මේ බොහෝ අයගෙ වැඩි දුර අධ්‍යාපනයක් නොමැති කම, දුරාචාරවලට යොමු වීම, පවුල් අසමගිකම, ජීවිතයේ සැලසුම් සහගත බවක් නැති කම නිසා... life එක එකම තැන. අද හම්බකරොත් අද කනවා. ඉතුරු තිව්නොත් හෙට වැඩ නෑ වගේ ජීවන රටාවක් තමයි... බොහෝ අයගෙ. ඒක දැන් ඒ අයට පත්තියන් වෙලා ඇට මිදුළු දක්වා. ඉතිං ගෙදර, පවුල තුළ දියුණුවේ කුඩාම ලකුණක්වත් දකින්න බැරි තරම්. ඔය අතරේ උපාදි ගත්ත, උගත් දැනුමැති අය පවා මේ ජොබේ නැතුවාම නෙවේ.

ඔහොම ජීවන ගමන් යමින් මුළු ජීවිතේම මහමග ගෙව් ත්‍රීවිල් උන්දලා කස්ටියකුත් ඉන්නවා නෙව.

අපිට අමතක උනාට මේ උපසංස්කෘතියත්... ලංකාව ඉන්නෙ කොතැනද කියල සලකුණු කරන්න දායකත්වය දරනවා.

එහෙව් විවිධ ජීවිත රටාවලින් වලින් නැගෙන වදන් තමයි අපට ත්‍රීවිල් පිටිපස්සේ ලියවිලා තියෙනවා දකින්න ලැබෙන්නෙ. මේ සමහර වදන් ඒ අයගෙ මුළු ජීවිතම විදහා දක්වන කැඩපත, ජීවන දර්ශනය වෙන්න පුළුහං... තමන්ගෙ අනාගත සිතුම් පැතුම්, බලාපොරොත්තු වෙන්නත් පුළුහං.

ඒ නිසා ඒ හැම වදනක් තුළම නොකියවුණු කතාවක් ඇති.. පිටුහින් වෙන්ට ලියාපු......

 

පිඹගෙන එන්නෙ ඉඹගෙන යන්නද

රුසියාවට වඩා ලොකුයි ඊරිසියාව

Masha Allah

වමෙන් ගියත් අපි දකුණේ

මං නැති දා සිතට දුකක් නුඹට නම් නැති

If you are Bad. I'm your Dad

රෝද තුනක් උඩ හීන ගොඩක් ඇත

හීන තිබුනට කෝටියක් අතේ නෑ එක රුපියලක්

මම ඇරලා යන්න හරිම සූරයා

මම රාජ කුමාරයෙක් නෙමේ ගමේ කොල්ලෙක්

ණයට හයර් යන්න සිතා රථයට ගොඩ වෙන්න එපා

කට්ට උනත් ආසාවෙන් කනකොට පට්ට

ගෙනාවෙත් නෑ ගෙනියන්නෙත් නෑ ඉන්නකං විතරයි යකෝ

කරුමේ ඩබල් පින සිංගල්

දවසක් ඒවි අපිත් අපේ හීන වලට යන

නැන්දම්මේ උඹත් එපා. උඹෙ දුවත් එපා

නැන්දෙ මාමෙ මේ අහන්න දුව බෑ අමතක කරන්න

ගුල්ල වැඩර් වෙන්නේ බාල ලීයෙදි විතරයි

අපිට හොරෙන් අපි විකිනෙන අමුත් රටක් මේක

අම්මා සඳක් වූ ලෝකෙ මුළු අහසම නුඹයි තාත්තේ

සෑම මවක්ම ලෝකයේ අනාගතය තම කුසේ දරා සිටී

කොලොම්පුරේ නුඹේ ගෙදර පහළ කාමරේ මාව තියා ගන්න බැරිද රත්තරං පුතේ

අම්මේ ඔබෙ ගුණ කීමට හෝඩියේ අකුරු මට මදි

මල් පිරි පොකුණත් කලකට කලින් මඩ වලකි

රුපියල් සත නිසාද අපිට මේ දුක

ලොවට බොරු කළ හැකි නමුත් තම සිතට බොරු කළ නොහැක

අවංකව සිනාසෙන්නේ කිරි දරුවන් පමණි

ළිඳ මගේ නම්, මං ළිඳේ නම් කාටවත් ඇයි වේදනා

සිංහලේ, දෙමළේ, මුස්ලිම් ලේ මිය ගියාම එකම වලේ

නුඹ ගඟක් වෙලා ගලන්න - මට හුඟක් වෙලා නාන්න

වයසට ගියත් - හවසට ගෙදර

අපිත් මාතෘකා, අපි නැති තැන්වල

ඔබ පහුඋනා නොවෙයි මා ඔබ පහුකලා

පුංචි අපිත් හරි ආසයි හයියෙන් යන්න

No Race - අම්මා Case

මාලේ ගෙලේ, චේ පපුවේ, කිසිම දෙයක් නෑ ඔලුවේ

අපිට හිනා වුණු අයට රෝද තුනක්වත් තිබුනෙ නෑ අම්මෙ

කොල්ලො ළපටියි - කෙල්ලො කපටියි

කාසි සද්දෙ දැම්මට නෝට්ටු සයිලන්ස් Bro

කට්ට කන්න බැරිනම් පට්ට හීන දකින්න එපා බන්

හැමෝම දාන වදන්වලින් අපි දැන් පදං වෙලා Bro

වේලි වේලි හිටියත් කෑලි කෑලි කැපුවත් හාල් කෑලි නම් එපා

ගමට බහිද්දි මිනිස්සු මාව අඳුරගන්නෙ වාහනේ සද්දෙන්

කොල්ලො කරුවලට බයයි නම් මෝහිනීට කොහෙන්ද ළමයි

දුව ගෙදර පහන නම් අපි ලයිටර්ද අම්මෙ?

සල්ලිම ජීවිතේ කර ගත්තට මිනී ඇඳුමෙ සාක්කු නෑ මහත්තයො

ගොලුවොත් කාතාකරයි ඇති දාට, කතා කරන අයත් ගොලුවෙයි නැති දාට

බොක්කෙන් ලව් කරපු කාලේ කෙක්කෙන් පොල් කැඩුවා නම් මම අද කෝටිපතියෙක්

කෙල්ලො ළඟ හිටියොත් හොටෙල් බිල්, දුර හිටියොත් ෆෝන් බිල්, දාල ගියොත් බාර් බිල්

රෝද තුනක් උඩ හීන ගොඩක් ඇත

අයිසැක් newton අපිත් දකින්නැති ගණන් හදන්නැති ඒ කාලේ, campus යන්නට ලකුණක් මදි ඇති ඒකයි තවමත් මහපාරේ

ඉගිලෙන්න තහනම් නම් දුරක් ඇයි දුන්නෙ මට ලයිසන් එකක්

ලොවේ විශ්වාසවන්තයින් දෙදෙනෙකි. එක් අයෙක් මියගොස් ඇත, අනෙකා ඉපදී නැත.

මා පසුකර යන රියදුරන්ට ත්‍රිවිධරත්නයේ පිහිටයි

මග හැරුණු අතීතයට වඩා ගොඩනගාගත් අනාගතය වැදගත්

අපිට පනින නයි, මුගටි හපා කයි

අපේම නයි අපිවම කයි

සෙවනැල්ල පවා සිටින්නේ ආලෝකය ඇතිවිට පමණි

හබලක්වත් නැති අපට නැව් ටෝක් මොකටද

ONLY ONE SUN SHINE FOR ALL

NO BODY HONEST IN THE WORLD

Oh Please Let me Come in Your Dream This Night

NO BODY HONEST IN THIS WORLD

assumption is the mother of all screw ups

කොච්චර ගස්සල පද්දල ගියත් අන්තිමට කුස්සිය තමා නංගි

ආදරය නැමැති මාලිගාවේ යතුර විශ්වාසයයි

හෝන් ගැහුවට පාර පළල් වෙන්නෙ නෑ හු##

සල්ලි ගස්වල හැදෙයි නම් කෙල්ලෝ වඳුරන්ටත් ලව් කරයි

සුදු මුහුණයි හුරතලයයි හරි අවදානම්

සම්බුදු සරණයි , එංජිම පරණයි

 

“ත්‍රීවීල් කරුවෝද මනුෂ්‍යයෝය”

 

 

ආයේ පත්තරේක දැක්ක මේ කවිය ත්‍රීවීල් එක්ක ගහල තිවන කියල...

මට මං වෙන්න මේ හොඳටෝම ඇති

මට ඌ වෙන්න තව ටිකක් මදි

ඒ ටික වෙන්න ජීවිතේ කාලය මදි

ඒ නිසා මට මේ ටික හොඳටම ඇති

 

මේ අස්සෙ තවත් blog වල ලියා තිව්න ත්‍රීවිල් පොස්ට් හතරක් හම්බු උනා... ඒවත් ඉතීම් කියවල බලන්ට.

 

ඉවාන් පවුලූශා -  කරුමෙ ඩබල් පින සිංගල් - මේකනම් පොඩි විග්‍රහයක යෙදෙනවා යෙදුන් සම්බන්ධයෙන්

පාඨයකාගේ පිටුව - ''අපිත් මාතෘකා, අපි නැති තැන්වල'' ( 'නූතන ප්‍රස්ථා පිරුළු' හෙවත් ත්‍රිරෝද රථ කියමන්)

සෑම්ගේ කතාව - ත්‍රීවීල් සහ පරිකල්පන මෙව්වා එක... SL Tuk Tuk Habits !!

වල් පල් - ත්‍රීවීල්,ලොරි සහ බස් අයියලාගේ කතා

Read More

මගේ tv බැලිල්ල නම් ගොඩක්ම අඩුයි. අඩු කරල, තනුක කරලා, ඇල් කොරල, මන්ද කොරල තියෙන්නෙ. ඉඳ හිට Youtube පොජ්ජට මන්ද කෙරුවොත් ඇරෙන්ට. එක හේතුවක් දෑසේ අමාරුව වැඩි වෙන එක. අනිත් කාරණේ ප්‍රවෘත්ති, headline, breaking news එහෙම බැලුහම රුධිර පීඩන ඇතුළු සියලු පීඩන හයිවේ මාර්ග පොජ්ජට මංගැජ්ජුව වාගේ බලාත්මක වෙන එක. බලන අයට හරියන්නත් එක්ක නම් නාලිකා ඇති පදං තියෙ හැට හුටහමාරක්, කේශනාලිකා සමව. ඔහොමත් දවසක් එක කෙලි පොඩියක් අමාරු සිංහලෙන් බස හසුරුවනවා දැක්ක.. ලං කරලා බැලින්නම් මේ සින්ග්හල දීපෙම උපන් කාන්තාවක්.. කොටට ඇඳන් හිටි නිසා පොඩියට පෙනුනේ. අර තියෙන්නේ ලිඳ ළඟ සංගමයට අයත් programe.. ආන් ඒකක. කෙල්ල ඉතින් සිංහල අමාරු ඉට්ටයිල් එකට, රට කඹුරලා ආපු ගෑණු උන්ද ලංකාවට ඇවිත් ඇහුවලුනේ who’s this කියල බැඳල හිටි මිනිහ පෙන්නලා. ඌ අම්මමො මතක් කරාම ගෑණිට පරණ මතකේ ආපහු ඇවිත්. ආන් ඒ ascent එක. හුරතල් වෙන්න දඟලන වැඩිහිටියන්ගෙ ඉට්ටයිල් එක... මේක එන්නෙ ඔය කාන්තා පාර්ශවයට විතරයි මයෙ හිතේ. ඒත් වැඩි හරියක්ම පිරිමි උන්දැල ඉස්සරහ. මත්තට අනෙක් පාර්ශවෙටත් බෝවෙයිද නොදනී යන හැටියට රට.

ඕකට අපහාස කරලා බෑ හිටන්... මොකද ඕකට කැමති පොපෙසර්ල පවා ඉන්නව. කැමති කියනවට වඩා ඔය ඇමට අහු උන කිව්වනම් වඩාත් හරි වගේ. දන්නෝ දනිති... කොහොමින් උනත් කියන්න තැටමුවේ අර වැඩසටහනේ ඒ නිලි දැරිවි හුරතල් තාලෙට තමුන්ගෙ ඉදිරිපත් කිරීම කරා... ගොඩක් අයට මේ ascent එකත් එක්ක මතක් වෙන්නෙ ඉන්දියන් සාගර තරණය කරන් ලංකාවට ගොඩබට පූජා. පූජා උමාශන්කර්. හැබැයි ඒ නිළියට පූජට වඩා හොඳ ඉදිරිපත් කිරීමේ කුස ලතාවක් තිබුණ.... රඟපාන්න බැරුවට. පූජට තිබ්බ අවුල කලින් සිංහල කතා නොකර තිබ්බ එකනෙ. ඒත් පිටපතට අනුව වචන උච්චාරණය දීල තියෙනවානෙ හැම ෆිලුමෙම දොඹෙන් යන්න.

ඇත්තටම ඔය සීන් එක නිසයි, ඈ ඉන්න දෙමළ ෆිල්ම් 3,4කුත් බලල නිසා පූජා අපේ නිළියන්ට වැඩිය කොච්චර ඉහළින් ඉන්නවද කියල හිතුන..

ජීව, ආර්ය, බරත්, නරේන්, ප්‍රශාන්ත් විතරක් නෙමේ ultimate star අජිත් එක්ක පවා රඟපාල තිබුණ පූජගෙ හොඳම රඟපෑම දැක ගන්න පුළුවන් වෙන්නෙ ඇස් අඳ චරිතයක් කරන (Nenu Devundni 2009) සිනමා සිත්තමෙන්. ඇයගෙ මේ රංඟනය එදා මෙදා තුර වෙනත් කිසිම කොලිවුඩ් නිළියකට නොදෙවෙනි එකක්. මගේ මතය black චිත්‍රපටයේ රාණි මුඛර්ජිගෙ රඟපෑම එක්ක වත් එකට තියන්න බැරි තරම්. ඒ තරම් තාත්විකයි, හැඟීම් ප්‍රකාශන උපරිමයි. එහෙම උනත් industry එකේ දිගටම රැඳිලා ඉන්න බැරි උනේ ගෙදරින් රඟපෑමට වැඩි කැමැත්තක් නැති නිසා හා එරෙහි වීම් වෙන්න ඕන.... (ඇය කියල තියෙන විදිහට). කොහොමින් නමුත් පූජගෙ කරුමෙටද අපේ වාසනාවටද මන්ද මෙහෙ ඇවිත් දැන් රඟපානවා. රඟපානවා විතරක් නෙමේ film hall වලට ප්‍රේක්ෂකයෝ ගෙන්න ගන්න තරම් ඇය දක්ෂ, සිත් වසඟ කරන නිළියක් උනා. ඒකට සිනමාත්මක බව ඉහලින් තියෙන ඉන්දියන් industryය සමග වැඩ කිරීම බොහෝ දුරට ප්‍රධානම හේතුවක් වෙන්නට පුළුවන්. කොහොමින් නමුත් ආපු වෙන ඉන්දීය නිළියන්ට ලංකාවේ සිනමාවේ ඒ දේ කරන්න නොලැබීම නිසා ඒ කාරණාව අර්ධ සත්‍යයක් වෙන්න පුළුවන් ඉඩ කඩ වැඩී.. සහජයෙන් ආ ඇයගේ රූපණ දක්ෂතාවත් එක්ක. මොනවා උනත් පූජාගේ දක්ෂතාවය කැපී පේන පිටපතක් ඇති කිසිම නිර්මාණයක් ලංකාවේ නාවත්, මෙතුවකට... ලැබිච්ච චරිත කරලා තියෙනවා ආයේ මදි නොකියන්න. පූජට ලැබුණ බොහෝ චිත්‍රපටි වල ප්‍රධාන නළුවා කුඹුරේ හිටවපු වැට සදිසි වෙනකොට පූජා දර්ශන තලයම රසවත් කරනවා තමුන්ගෙ නිසඟ හැකියාවෙන්. ළමයින් සඳහා නිමැවුණු සරිගම පවා කිසිම නීරස ගතියක් නැතිව නරඹන්න පුළුවන් වෙනවා පූජාට පින්සිද්ධ වෙන්න. වෙන නිලියක් රඟපෑවනම්... ඔය රසින් බලනවා ආයේ බොරු.

මාලනී ෆොන්සේකා එදා රිදී තිරයේ කප් ගැහුවෙ දක්ෂතාවයත්, ලස්සනත්, වාසනා ගුණයත් නිසා තමයි. හැබැයි එදා පූජාත් හිටිය නම්... මාලනී දෙවෙනි තැනට වැටෙනවා. ඒ විතරක් නෙමේ ගාමිණි, විජය පොරකයි දේශපාලනය පැත්තකින් තියල පූජාත් එක්ක රඟපාන්න.. වගේම කරකාරෙට ගන්න. ඔය වගේ දේවල් හින්ද ඉතින් එක අතකින් පූජා ඒ කාලේ නොහිටිය එකමයි හොඳ.

ජැක්සන් ඇන්තනී එක්ක රඟපෑමට 90 දසකයේ අවසන් හරියෙන් පහු, ආපු හැම ෆිලුමේම වගේ ප්‍රධාන තියා මොනම නිළියක්වත් හිටියෙ නෑ කරට කර තියා, ආසන්න දුරකටවත් එන්න. නළුවො පවා පොඩි පිරිසයි ඉන්නෙ. ඒත් කුසපබා සිනමා සිත්තමේ පූජ රඟපානවා ජැක්සන්තුමා සමග කරට කර.. ලංකාවේ කිසිම නිළියකට නොකරගන්න බැරි වෙච්ච දේ මගේ අදහසට අනුව නම් පූජා කරා කියන ඒකයි. ඒ මදිවට අපේ රටේ වැඩිම වරක් අගමැති අසුනේ හිඳ නැගිටි රනිල් තුමාට පවා හාදුවක් දෙන්න ඇයට හැකි උනා. හාදුවේ උණුහුම රනිල් තුමාට දැනුණ නොදැනුණා.

ඒ ඔක්කොම හැරුනම පූජගෙන් අපිට තේරුම් ගන්න පුළුවන් වැදගත් සමාජ කාරණයක් තියෙනවා. ඒ තමයි පිරිමි තමුන්ට පෙම්වතියක් තෝරා ගැනීම සම්බන්දව.. පූජා සූත්‍රෙ apply කිරීම. දැන් නිකං තේරුනේ නෑ වගේ නෙ. ඇත්තටම ලංකාවේ අති බහුතර පිරිමි කාන්තාවක් පෙම්වතියක් ලෙස තොර ගැනීමේදී මේ පූජා සූත්‍රෙ ආදේශ කරලා බලනවා. එක මෙහෙමයි වෙන්නෙ. ඔන්ට කෙල්ලෙක් ඉන්නව, කොල්ලෙකුගේ හිතට වදින.. කෑල්ල හොඳයි. හැඩයි. හැබැයි පූජා ස්ටයිල්. ඒ කියන්නෙ....  ඒ කියන්නෙ හම්බෙන, කතා කරන ඕන පිරිමියෙක් එක්ක barriers නැතුව කතා කරනවා. කතා කරලා හොඳට හිනා වෙලා ඉන්නවා. මේක විරුද්ධ ලිංගිකයෙක්, අත අල්ලන්න එහෙම ගෑවෙන්න එහෙම දෙන්න හොඳ නෑ වගේ barriers මෙයාල ගාව නෑ. මනුස්ස කම, හොඳ කම නිසා ආශ්‍රය කරනවා, කතා කරනවා... හැබැයි ලංකාවේ සාතිශය බහුතරය අකමැති තමන් සතු හෝ පෙනී ඉන්න පෙම්වතී /බිරිඳ වෙන පිරිමි සමග කතා කරනවට, කුළුපග වෙනවට. රෑට කොල්ලෙක්ට good night කියල දාල, උදේට අහු උනොත් දවසෙම ප්‍රශ්න.. කෙල්ලට. එකට ළඟ වාඩි වෙලා කතා කරකර හිටියොත්, hug කරොත් කෙලින්ම හතරවෙනි තට්ටුවට කැඳවනු ලැබේ.. කොල්ලා විසින්. තමන්ට රෑ දෙගොඩ හරියෙ උනත් ගෙට enter වෙන්න අවසර තියෙන කොට, ඇයගෙ පොඩි ප්‍රමාදය සැකයට හේතු වෙනවා. සමහර ගෙවල්වල CCTV පවා දාල තියෙනවා බිරිඳ මොනවද කරන්නෙ කියල... කුකුස වැඩි පිරිමි මහත්තරු.

අනෙක් අතින් මේ වගේ කාන්තාවක් පෙම්වතිය නොකර, යෙහෙළිය කරගන්න මේ බහුතර කස්ටිය එකෙන්ම කැමතියි. එකට කන්න යයි, තනි රකින්න ළඟ ඉඳි.. ඕනෙ නම් shopping යන්න පවා එයි.. පැය ගණන්. රෑට කෝල් කරලා sweet dreams කියයි. වැඩකරන තැන නම් side support දෙයි තමුන්ගෙ වැඩ පසෙක දාල හරි. ඇයි.... අර නොවිඳි පොඩි sex arrears කවර් කර ගන්න. සමහරුන්.. මතු හම්බෙයි කියා සිතන් ඉන්න සැපක් එයයිගෙන් විඳ ගන්න. ඔය අතරමැද ජීවිත ගෙවන පූජ style කාන්තාවන්, බිරියන් හරි අසරණ වෙනවා. ආශ්‍රය කරන අනෙකගෙ හිත දැන ගන්න ඒ අයට බෑනෙ. ඒ වගේම එකපාර හිටපු විදිහ වෙනස් කරන්නෙ කොහොමද... හරියට මැරිලා උපන්න වගේ. ඉතින් ප්‍රශ්න. අඹු-සැමි, පෙම්වත්, යහළුකම් අතර.

ඉතින් පූජ තියරිය/ සූත්‍රෙ.. අපිට මතක් කරලා දෙනවා සමාජය තුළ අනෙකා- මම සම්බන්ධතාවය කොහොම විය යුතුද කියා....       ඔයා මාරයි පූජ.

Read More

Man in Black (1997) එකේ ‘Agent J’ නොදන්න කෙනෙක් නැති තරම්. Will Smithව ලෝකෙම දැන ගන්නෙ ඒකෙන්. ලෝකෙම ආදරේ කරන Will Smithගෙ 53වන උපන් දිනය යෙදිල තියෙන්න අද. Smith චිත්‍රපට වලින් අතිශය ජනප්‍රිය වුනත් කළා දිවිය පටන් අරං තියෙන්නෙ 1980 ගණන්වලින් Rap සංගීතඥයෙක් විදිහට The Fresh Prince කියන අනුවර්ත නාමයෙන්. ඒ වගේම පළමු Grammy Award එක අරං තියෙන්නෙ 1989.

The Fresh Price ලෙස රැප් කරමින්

Will Smith රඟපාපු හැම චිත්‍රපටියක් වගේම සාර්ථක උනා. Box Office හිට් උනා. පළවෙනි Box Office එක වෙලා තියෙන්නෙ Bad Boys (1995). ඊට පස්සෙ අවුරුද්ද ආපු Independence Day 1996යෙ වැඩිම ආදායම් ලබපු චිත්‍රපට අතරින් එකක් වෙලා තියෙනවා.

1997 දි අපි හැමෝම බලපු Man in Black චිත්‍රපටියත් world හිට් එකක් උනේ ස්මිත් hollywood වල සුපිරි තරුවක් බවට පත් කරලා. ඒකෙ ස්මිත් කල රංගනයටද විචාරක පැසසුම් මදි නොකියන්න හම්බෙලා තිබුණ. ඒ චිත්‍රපටියෙ තේමා ගායනා කරෙත් ස්මිත්. ඒ සින්දුවත් හැම චාට් එකකම No1 උනා.

ඒ වගේම මං ඇතුළු හැමෝම බලල තියෙන Bad Boys (1995), Men in Black 2(2002), i robot (2004), Bright (2007), Hancock (2008), Focus (2015), Concussion (2015), Collateral Beauty (2016), Aladdin (2019) සුපිරි චිත්‍රපටි.

රූපය - අන්තර්ජාලයෙන්

Concussion (2015) - ක්‍රීඩකයන්ගේ හිස් ගට්ටනය වීම නිසා ඇතිවන මොළයේ රෝගයක් සොයාගන්න වෛද්‍ය ඔමාලුගේ සත්‍ය කතාව ඇසුරින් නිපදවුණු මේ චිත්‍රපටයේ ඔහුගෙ රඟපෑම ඉතා තාත්විකයි. 2016 ආපු Collateral Beauty චිත්‍රපටියේ රඟපෑමද විචාරක පැසසුමට ලක්වුනා. ඒ වගේම චිත්‍රපටියට අත්සන් තැබීමෙන් කෙටි කලකට පසු Smithට තම පියා පිළිකාවක් නිසා අහිමි වුනා. චිත්‍රපටයේ ඔහුට රඟ දක්වන්න තිබුනෙ පිළිකාවකින් තම දියණිය අහිමි වුන පියෙකුගේ චරිතයක්. එතකොට 2007දී Netflix නිෂ්පාදකයින් එතෙක් ඔවුන් දැරූ වැඩිම පිරිවැය යොදමින් Bright චිත්‍රපටිය සඳහා ස්මිත්ව යොදා ගත්ත. 

Concussion (2015) හි තාත්වික රංගනයක යෙදීමින්

ත්‍රාසජනක අත්දැකීම් ලබා ගන්නටද කැමැත්තක් දැක්වන Smithගෙ ඒ ක්‍රියාවන්වල යෙදෙන video ඔහුගේම YouTube නාලිකාවෙන් බලා ගන්නත් පුළුවන්. ඒ හරහාද විශාල පිරිසක් ඔහු හා එකතු වෙනවා.. ඉතින් සුභ උපන්දිනක් Will Smith.

Read More

   අද පෝය නිසා Facebook එකේ දැකපු මේ ලිපිය මෙහෙම පළකරන්නම්

 

අවුරුදු දහයක් විතර මම බණ කිව්වේ හරිම අමාරුවෙන් මට පෙනහලු වල දිගු හුස්ම ගැනීමේ අපහසුවක් තිබුණා. ඒ ඇදුම රෝගය... බණට යන්න කලින් නෙබියුලයිස් කරනවා. ඉන්හේලර් දෙකතුනක් තියාගෙන බණ කිව්වේ. බණ කියද්දී හුස්ම රදවගන්න අමාරුයි නවත්තගන්න බැරි කැස්සකුත් එනවා. සමහර දවස්වලට පැයක් බණ කියල ඉවර වෙද්දී පපුව හිරිවැටිල. ඉස්සර මම මාස තුන හතරකට සැරයක් රෝහල් ගතවෙනවා හුස්ම ගැනීමේ අපහසුව නිසා. අමාරුවෙන් හුස්ම පාලනය කරමින් බණ කියල බණ ඉවරවෙලා සිහිනැතිව වැටිලත් තියනව.

ඒ කර්මයට මම අභියෝග කලේ "සීල සුව අරණ" හදල. ගිලන් භික්ෂූන්ට අද මම නොමිලේ ප්‍රථිකාර කරන අංග සම්පූර්ණ රෝහලක් බදු මධ්‍යස්ථානයක් ඉතා දුක් මහන්සි වෙලා ගොඩනැගුවා. අද නේවාසිකව 35 නමක් විතර ගිලන් භික්ෂූන් ප්‍රථිකාර ලබනව. ගිලන්රථ සහ හතලිස් දෙනෙක් පමණ රෝහල් කාර්ය මණ්ඩලයක් මගේ යටතේ අද සේවය කරනවා. ආයුර්වේද පංචකර්ම ප්‍රථිකාර ක්‍රම බටහිර ප්‍රථිකාර දෙකම සිදුකරනව. ඊට අමතරව මම රෝහල් රැසකට වෛද්‍ය උපකරණ රෝහල් ඇදන් බෙහෙත් වාර්ෂිකව පරිත්‍යාග කරනවා.

නිරෝගී භික්ෂූන් අතර අගතැන්පත් බක්කුල මහරහතන්වහන්සේ නාමයෙන් දෙව් මිනිස් ලෝකයාට අඩි 130 උස චෛත්‍යයක් මම ඉදිකරගෙන යනව. ඒ කර්මයත් මම ජයගත්තා දැන් මට බණ කියද්දි ඒ අපහසුතා කිසිවක් නැහැ. දිට්ඨධම්මවේදනීය පිනම තමයි.

අකුසල කර්ම විපාක බලවත් නම් කොච්චර බෙහෙත් බීවත් ලෙඩ හොදවෙන්නෙ නැහැ. හොඳ වෛද්‍යවරු වෙලාවට මුණගැසීමත් පිනක වෙස් වලාගත් ආශිර්වාදයක්.

හිටපු සේනාසන වලින් මාව එලියට දැමීම. ඉන්න ආයතනයක් නැතිව සිවුරු පාත්තර අරගෙන ආරණ්‍ය ගානෙ ඇවිද්ද. පංසල් වලින් ආරණ්‍ය වලින් මාව බාරගත්තේ නැහැ. කුලියට පුංචි ගෙයක් අරගෙන තනියම බණ කියමින් අවුරුදු තුනහතරක් ටික ටික ආයෙ උස්සහයෙන් නැගිට්ට. දානයක් නැතිව දවසම බඩගින්නේ හිටපු දවස් අනන්තයි. මට කියල ආයතනයක් හදාගන්නෙ නැතිව ඒ අමාරුම කාලෙ බණ කියද්දී ලැබුණු දහම් පරිශ්කාර මුදල් වලින් ගෙදර ගිනි අරගෙන ඉන්න. තැනක් නැතිව සොහොනක හිටපු පවුලකට ගෙයක් හදල දුන්නා. අද වෙද්දී මම අසරණ පවුල් වලට ගෙවල් විස්සක් විතර හදල පරිත්‍යාග කරල තියනවා. ඒ පිං වල දිටඨධම්මවේදනීය විපාක අද මට ලැබෙනවා.

නිවන් දකිනකම් සිව්පසයෙන් මට ආයෙ අඩුවක් නම් වෙන්නෙ නැහැ කියල මට ලොකු විශ්වාසයක් තියනවා.

අද මාධ්‍යවල බණ කියන ගොඩක් ප්‍රසිද්ධ තරුණ ස්වාමීන්වහන්සේලාට දක්ෂතා මතුකරගෙන ඉදිරියට යන්න මම උදව් කරල තියනවා. ඉගෙනගන්න පාසල් දරුවන් දසදහස් ගනනකට මම උදව් කරල තියනවා. Colombo Tv / මෙත් සදහම් විකාශය තුළින් ගොඩක් දක්ෂ ධර්ම දේශකයන් වහන්සේලාට ඉදිරියට යන්න මම අවස්ථාව හදල දීල තියනවා. දක්ෂයන්ට ඊරිසියා කරල කුහකකම් කරල ඉදිරියට යන්න බැහැ. ඒ විපාක තමන් කරා එනවා. මේ වෙද්දී මම රටවල් තිහකට පමණ වැඩම කරල ධර්ම දේශනා කරල තියනව. අද මා තුළ දහම් දැණුමක් තියනවනම්, ධර්ම දේශනා කිරීමේ කුසලතාවයක් තියනව නම් ඒ මම වපුරපු අස්වැන්න. මම කවදාවත් බණ කියද්දී අනුන් විවේචනය කරන්නේ නැහැ. කාවවත් පහත් කරන්නේ නැහැ. මගේ බණක් නිසා කිසිවෙකුගේ සිතක් නොරිදේවා කියන අදහසින් මම බණ කියන්නේ.

මම ඔය කිව්වෙ කර්ම විපාක වලට පිනෙන් අභියෝග කල කරුණු වලින් ටිකක් විතරයි.

කරුමෙ, කරුමෙ කිය කියා ඉන්නෙ නැතිව. හැදෙන කෙනෙකුට මේ ටික හොඳටම ඇති වැටිච්ච තැනින් නැගිටින්න. කර්මයට අභියෝග කරන්න. ගොඩක් අය අද අපේ බණ ඇහුවට අපි කල කැපකිරීම් දශමයක්ස්වත් දන්නෙ නැහැ.

~ ගලිගමුවේ ඤාණදීප හිමි.

https://youtube.com/playlist...

https://youtube.com/c/BudugunaAnanthai

උපුටා ගැනීමක්..

Read More

  ලෝකයේ පෙණහැල්ල විදිහට පරිසරවේදියෝ, විද්‍යාඥයො හඳුන්වන ඇමසන් වැසි වනාන්තරය ගැන ආයෙමත් අවධානය යොමු වෙලා, යොමු කරන්න වෙලා.. ඒ Amazon 2020 අගෝස්තු සහ 2021 ජූලි අතර කාලය තුළ වර්ග කි.මී. 10,476 ක් අහිමි වූ බව වාර්තාව වීමත් එක්ක. නිව් යෝර්ක් නගරයේ වගේ 13 ගුණයක් විශාලයි මේ කියන ප්‍රමාණය.

චායාරුපය අන්තර්ජාලයෙන්

Amazon වනය අසමසම වෙන්නෙ... ජෛව විවිධත්වය, ස්වදේශික ගෝත්‍රික පිරිස, දුර්ලභම සත්ව හා ශාකත් එක්ක. විද්‍යාත්මක වර්ගීකරයට අනුව දුර්ලභ ශාක හා සත්ව විශේෂ (වඳවී යන) වගේම සොයාගත් ක්ෂීරපායින් 427ද, උභය ජීවීන් 428ද, පක්ෂීන් 1294 පමණද, මත්ස්‍ය 2200ද, උරඟයින් 378ද, හා ස්වදේශීය ගෝත්‍ර පිරිසක්ද ඉන්නව. ඒ වගේම මුළු පෘතුවියේ සිටිනා කුරුලු විශේෂ 5/1ක්ද ඉන්නෙ Amazon වල. එතකොට අපි ෆිල්ම් වලින් දැකපු උරඟ පවුලේ විශාලම සතා වන ඇනකොණ්ඩ ඉන්නෙත් මෙහෙ. ඒ වගේම අධික විෂ සහිත ශාක හා සත්ව කොටසද Amazon සතුයි. කොච්චර විසද කියල තේරුම් ගන්න පුළුවන් සමහර සතුන්ගේ විෂ ශරීර ගතවුන පුද්ගලයා පැය භාගයක් යන්නත් කලින් මැරෙනව කියද්දි. රටවල් කිහිපයක් පුරා පැතිරුණු ලෝක උරුමයක් වන Amazon වගේම ඒ සතුව තියෙන Amazon ගඟත් රටවල් කිහිපයක් පසුකරමින් තමයි මුහුදට ගලා යන්නෙ. ලෝකයේ දෙවෙනියාට විශාලත්වය දරන මේ ගඟෙ දිග 6400km වෙනකොට වැඩිම පළල් ස්ථානයේ පරතරය 30km කටත් වැඩි. ගඟෙන් මුහුදට වතුර වැටෙන තැන ඉඳල 150km තරම් දුරකට යනතාක් ඒ ජලයේ ලවන ප්‍රමාණය බෙහෙවින් අඩුයි. ඒකෙන්ම හිතා ගන්න පුළුවන් කොච්චර ජල පරිමාවක් මේ Amazon ගඟෙන් සාගරයට එකතු කරනවද කියල.

බ්‍රසීලය, පේරු, බොලිවියාව, කොලොම්බියාව, වෙනිසියුලාව ඇතුළු රටවල් නවයක් පුරා තියෙන Amazon වල වැඩි කොටසක් අයත් වන්නේ බ්‍රසීලයට. ජනාවාස බිහිවීම, වනාන්තර එළිපෙහෙළි කිරීම, පාරවල් සෑදීම, ගිනි ගැනීම්, නියඟය වගේ දේවල් නිසා ලෝකයට මහා සම්පතක් වෙන Amazon ටිකෙන් ටික විනාසයට තමා යන්නෙ. පරිසරවේදියෝ, පරිසර හා සත්ව විද්‍යාඥයො මේ ගැන නිතරම වාර්තා කිරීම්, බලධාරීන්ට දැනුම් දීම් කොච්චර කළත් කිසිම ප්‍රයෝජනයක් නැති තරම්.. මොකද මෙහෙ වගේ දේශපාලන අතපෙවීම් එක්ක ඒ හැම දේම වැහිලා යන නිසා. විනාසය තව තවත් වැඩි වෙන්න පටන් අරං තියෙන්නෙ Amazon භූමියේ තෙල් තියෙන බව තෙල් සමාගම් දැන ගත්තහම. කල් යද්දී සමාගම් වලට අධිකරණයට යන්නත් වෙන්නෙ වැඩ වල හොඳ කම නිසා. ඒත් විනාසය එහෙමමයි..

ආර්ථික වාසි තකා මේ වගේ දේවල් සිදු වෙද්දි අධිවේගී මාර්ගයක්ද Amazon වල හදල තියෙනව. මේ මාර්ගය නිසා Amazonවල වෙන විනාශය තවතවත් වැඩි කරමින් වායු දුෂණය, පාංශු ඛාදනය, ශාක විනාශය, භූගත ජල පෝෂකවලට හා සත්ව ජීවිතයටද ඇති බාධක වැඩි. මේ පාරක් නිසා දෙකට බෙදුණු Amazon ගැන අදාළ බලධාරීන් හෝ ඒ රටවල පාලකයන් වගේ වගක් නැතුව වාගේ ආර්ථික හා පුහු සංවර්ධනයක් ගැන කිය කියා ඉන්නව ලංකාවේ වගේ. මේ වගේ වැඩ වලදී එක එක විරෝධතා ආවත් ඒව වැඩි කල් තියෙන්නේ නැති නිසා පාලකයන්ටත් ඒ ගැන ගානක් නෑ.

Amazonවලට හානිවන තවත් දෙයක් වෙන්නේ සැරින් සැරේ සිදුවන ගිනි ගැනීම්. වැසි නැති කාලවල ඇති වන මේ ලැව්ගිනි ස්වාභාවික සංසිද්ධියක් කියලම කියන්න බැරි මිනිස්සුන්ගෙම වැඩ වලින් වැඩි වෙන පරිසර උෂ්ණත්වයත් එක්ක. නියං කාලයට අක්කර පිටින් ගිනි ගෙන දින ගණන් වෙන මේ විනාශය පොඩි නෑ. මේ ගින්නෙන් දැවී යන ශාක සම්පත හා සත්ව සම්පතේ වටිනාකම කියල නිම කරන බැරි තරම්...

Read More

සියදිවි නසා ගැනීම් වැළක්වීමේ ජාත්‍යන්තර දිනය යෙදිල තියෙන්නෙ හැම අවුරුද්දකම සැප්.10 වෙනිදා.

2020 වසරේ සියදිවි නසා ගැනීම හේතුවෙන් ලංකාවේ 3,074ක් මිය ගිය බවත්, වසර කිහිපයකට පෙර පුද්ගලයන් ලක්ෂයකට 45ක් ලෙස පැවති මෙරට සියදිවි නසා ගැනීමේ ප්‍රතිශතය, මේ වන විට ලක්ෂයකට පුද්ගලයන් 14ක් දක්වා පහළ වැටි ඇති බව ජාතික මානසික සෞඛ්‍ය විද්‍යායතනයේ විශේෂඥ වෛද්‍ය පුෂ්පා රණසිංහ සිළුමිණට කියල තිබුණ.

ලෝකයේම වසර ගණනාවක ඉඳන් පුද්ගලයින්ගේ මරණයට හේතුවන සිව්වන ප්‍රධානතම කාරණයත් මේ සියදිවි නසා ගැනීම. 

චායාරූපය අන්තර්ජාලයෙන්

ගෘහස්ථ හිංසනය, මානසික ආතතිය හා ලෙඩ, විරැකියාව, හිංසා, අපයෝජනය කියන දේවල් දරා ගන්න බැරුව ඒ නිසා සියදිවි නසා ගන්න පෙලඹෙනව. මේ විදිහට සිය දිවි නසා ගන්නන් හැම රටකම පොදු උනත් ඒ අතරින් වැඩි කොටසක් අයත් වෙන්නෙ දුප්පත් කියල හඳුනාගත් රටවලට බව ලෝක සෞඛ්‍ය සංවිධානය (WHO) සඳහන් කරල තිබුණ. ඒ වගේම බරපතළ මානසික සෞඛ්‍ය ගැටලුවක් වන මේ සියදිවි නසා ගැනීම අවම හා තුරන් කිරීමට ඒ ඒ රටවල රජයන් නිවැරදි තීන්දු, තීරණ ගන්න ඕන වගේම  ඒ සඳහා අවධානය යොමු කළ යුතු කරුණු ගැනත් සඳහන් කරල තිබුණ.

• සියදිවි නසා ගැනීමේ මාධ්‍යයන් වෙත ප්‍රවේශ වීම සීමා කිරීම් (උදා: පළිබෝධනාශක, ගිනි අවි, ඇතැම් ඖෂධ).

• සියදිවි නසාගැනීම් පිළිබඳ වගකීමෙන් වාර්තා කිරීම සඳහා මාධ්‍ය සමඟ අන්තර් ක්‍රියා කිරීම

• යෞවනයන් තුළ සමාජ-චිත්තවේගී ජීවන කුසලතා ඇති කිරීම

• සියදිවි නසා ගැනීමේ හැසිරීම් වලින් පීඩාවට පත් වන ඕනෑම අයෙකු කලින් හඳුනා ගැනීම, තක්සේරු කිරීම, කළමනාකරණය, පසු විපරම් කිරීම හා අධීක්ෂණය.

ගෝලීය වශයෙන් සියදිවි නසා ගැනීම් සහ සියදිවි නසා ගැනීමේ උත්සාහයන් පිළිබඳ දත්ත ලබා ගැනීමේ හැකියාව හා ගුණාත්මකභාවය දුර්වලයි වගේම ජාතික සියදිවි නසා ගැනීම් වැළැක්වීමේ ක්‍රමෝපායන් ඇතැයි වාර්තා වන්නේ රටවල් 38 ක පමණක් බවත් WHO එක කියල තිබුණ.

සියදිවි නසා ගැනීමේ අදහසින් ඉන්න පිරිසට සමහර වැරදි මාධ්‍ය හැසිරීම් නිසා එයින් තවත් උත්තේජන ලැබුණ අවස්ථාද ලෝක මාධ්‍යයේ සිදුවෙලා තියෙනව. එක සිද්ධියක් නම් කාන්තාවක් ගිනි උදුනට හිස ඇතුල් කරලා සියදිවි නසා ගෙන තිබ්බ සිදුවීම නිවැරදිව මාධ්‍ය මුදා නොහැරපු නිසා ඒ ක්‍රමය පාවිච්චි කරලා බොහෝ දෙකෙන් සියදිවි නසා ගන්න පෙළඹිලා තිබ්බ. ඉතින් මේ නිසා තමයි මාධ්‍ය පවා මේ කාරණයේදී සංවේදීව වැඩ කරන්න ඕන කියල WHO එක කියල තිබ්බෙ. මොකද රටේ ඉදිරි ගමන සමස්ත පුරවැසියන්ගේ සෞඛ්‍ය හා මානසික යහ පැවැත්ම මත රඳා පවතින නිසා.

දිවි නසා ගැනීමට සිතුවිලි ඇති ඔබ හෝ වෙන අය වේ නම් මේ දුරකථන හා සම්බන්ධ වී සහය ලබා ගන්න.

ශ්‍රී ලංකා සුමිත්‍රයෝ - 011 2 682 535 / 011 2 692 909

CCC පදනම - 1333 (නොමිලේ ඇමතුම්)

ජාතික මානසික සෞඛ්‍ය විධ්‍යායතනය - 011 490 000

Read More

 අලුත් අවුරුද්දට වටිනම උපසෙස් ටිකක් තියෙන සින්දුවක් තියෙනව රෝහණ බැද්දගේ හා බන්දුල විජේවීර දෙපළ කියන. හැමදෙනාගේම පහුගිය ජීවිත වල සිදුවුණු අඩුපාඩු, වැරදි තියෙනව. ඒව හදාගෙන ඉස්සරහට යන්න ගන්න හොඳ ආරම්භයක් විදිහට අවුරුද්දෙන් පටන් ගන්න පුළුවන්. තමන්ගෙ විතරක් දියුණුව බලාපොරොත්තු නොවී අනිත් අයටත් උදව්වක් වෙමින් යන ගමන් තමයි සාර්ථක. ඒ නිසා අපිට එහෙම ජීවත් වෙන්න පුළුවන් නම් අපි ප්‍රාර්ථනා කරන සමාජ දියුණුවත් ඉබේම වාගේ සිදුවෙයි.

 

දොළොස් මහක් ගතවී යන මොහොතේ

අන්තිම දවසේ මැදියම් රෑ..

කවුරුත් මුණගැහිලා යන්නයි ආවේ අපි දෙන්නා..//

 

අවුරුද්දක් තිස්සේ කළ කීදේ

මතක් වෙනකොටත් සමහර එව්වට

මටම හිනා මස්සිනේ

අවුරුද්දක් තිස්සේ කල කීදේ

මතක් වෙනකොටත් සමහර එව්ව්වට

මට ඇඬෙනවා මස්සිනේ

උඹ අඬන්ටෙපා මස්සිනේ..

අඬන එකා දැක හිනැහෙන්ටෙපා මස්සිනේ..//

 

දොළොස් මහක්.....

 

අලුත් වසරේදී අලුත නැගී එන

කෙනෙක් දුටුවොතින් හිත සන්තෝසෙන්

ඇත දීපන් මස්සිනේ

අලුත් කෙනෙක් දුටුවොතින් මමත් හරි ආසයි

ඒත් ඔය කපන්න බැරි අත

ඉඹින්ටෙපා මස්සිනේ

නැග්ග ඉනිමග පෙරලන්ටෙපා

නගින එකා දැක කකුලෙන් අදින්ටෙපා..//

 

දොළොස් මහක්...

 

පොළෙන් පොළට ගිය පොල් වෙළඳාමෙන්

යාන්තමට වගෙ ජාමේ බේරුණා

ඒත් මදැයි මස්සිනේ

ගොනා පිටේ හකුරුත් පටවාලා

වක්කඩේ හකුරු හංගා තියලා

හනේ වෙච්චි දේ මස්සිනේ

දැන් ගිය හකුරට නාඬන්නේ

ඔය තියෙන හකුර රැක ගන්නේ..//

        පද රචනය, සංගීතය - රෝහණ බැද්දගේ / ගායනය - රෝහණ බැද්දගේ සහ බන්දුල විජේවීර

Read More